ប្រជាពលរដ្ឋនៅខេត្តកំពតបានសម្ដែងការសប្បាយរីករាយដែលនឹងទទួលបានផ្លូវជាតិស្អាតចំនួន៣ខ្សែ ពីរាជរដ្ឋាភិបាលដើម្បីជួយសម្រួលដល់ការធ្វើចរាចរណ៍ ដឹកទំនិញ និងជំរុញការវិនិយោគនៅក្នុងខេត្ដឱ្យបានកាន់តែច្រើន។ លោកស្រី ប៉ូ មុន្នីរ័ត្ន ប្រជាពលរដ្ឋរស់នៅខេត្ដកំពតបានអបអរសាទរ និងគាំទ្រផែនការអភិវឌ្ឍរបស់រាជរដ្ឋាភិបាលដែលបានសម្រេចសាងសង់ជួសជុលផ្លូវជាតិសំខាន់ៗទាំង៣ខ្សែបន្ថែមទៀតដែលបង្កភាពងាយស្រួលដល់ប្រជាពលរដ្ឋធ្វើចរាចរណ៍ទៅកាន់តែឃុំ ស្រុក ខេត្ដ និងរាជធានីកាន់តែឆាប់រហ័ស និងទាក់ទាញការវិនិយោគ។ លោក​ ស្រី​បញ្ជាក់​ថា​ «សប្បាយចិត្ដដែលបានផ្លូវថ្មី ដែលធ្វើឱ្យការធ្វើចរាចរណ៍បានកាន់តែល្អ ព្រោះការអភិវឌ្ឍផ្លូវថ្នល់កាន់តែស្រួលជិះ ស្រួលធ្វើដំណើរជាដើម»។ ការបង្ហាញអារម្មណ៍សប្បាយរីករាយនេះបានធ្វើឡើងបន្ទាប់ពីសម្តេចតេជោហ៊ុនសែននាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចគម្រោងសាងសង់ផ្លូវជាតិសំខាន់ទាំង៣ខ្សែក្នុងខេត្តកំពត រួមមានផ្លូវលេខ៤១ តភ្ជាប់ពីផ្លូវជាតិលេខ៤មកកំពត ផ្លូវជាតិលេខ៣១ និង ផ្លូវលេខ៣៣នៅក្នុងខេត្តកំពត ដែលជាគម្រោងអាទិភាពក្នុងការអភិវឌ្ឍហេដ្ឋារចនាសម្ព័ន្ធក្នុងខេត្តនឹងជួយសម្រួលដល់ការធ្វើចរាចរណ៍របស់ប្រជាពលរដ្ឋ។ លោក សំ នាង ប្រជាពលរដ្ឋរស់នៅខេត្ដកំពត បានឱ្យដឹងដែរថា ផ្លូវជាតិសំខាន់ៗទាំង៣ខ្សែនេះ គឺជាសរសៃឈាមសេដ្ឋកិច្ចយ៉ាងសំខាន់ថ្មីបន្ថែមទៀត ដែលធ្វើឱ្យខេត្ដកំពតកាន់តែរីកចម្រើន និងមានការអភិវឌ្ឍលើគ្រប់វិស័យ។ ជាពិសេសតម្លៃដីឡើងថ្លៃ និងអាចមានរោងចក្រកើតឡើងយ៉ាងច្រើន និងជួយបង្កើតការងារជូនប្រជាពលរដ្ឋយ៉ាងច្រើនផងដែរ ។ លោក​បញ្ជាក់ថា​«ការធ្វើផ្លូវទៅខេត្ដកំពតខ្ញុំសប្បាយចិត្ដ ដែលរាជរដ្ឋាភិបាលសាងសង់ផ្លូវជាតិសំខាន់ៗទាំង៣ខ្សែ ដែលមានភាពងាយស្រួលទៅដល់បងប្អូនប្រជាពលរដ្ឋធ្វើដំណើរទៅកាន់តំបន់មួយទៅតំបន់មួយ ដឹកផលិតផល ងាយស្រួលសម្រាប់អ្នកវិនិយោគក្នុងការបណ្តាក់ទុននៅខេត្ដកំពត និងតភ្ជាប់សេដ្ឋកិច្ចយ៉ាងសំខាន់របស់ខេត្ដ»។ លោកបានថ្លែងអំណរគុណដល់រាជរដ្ឋាភិបាលដោយបាន សម្រេចសាងសង់ផ្លូវជាតិសំខាន់ៗទាំង៣ខ្សែក្នុងខេត្ដកំពតបន្ថែមទៀតនេះ ហើយក៏បានថ្លែងអំណរគុណចំពោះសម្តេចតេជោហ៊ុនសែន ដែលបានដឹកនាំប្រទេសមានសុខសន្ដិភាព និងការរីកចម្រើនលើគ្រប់វិស័យ ។ សូមបញ្ជាក់ថា គម្រោងសាងសង់ផ្លូវទាំងបីខ្សែខាងលើនេះ បានបញ្ចប់ការចរចានិងឯកភាពគ្នារួចរាល់ ហើយបានប្រគល់ជូនឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការនិងដឹកជញ្ជូន ដើម្បីចុះហត្ថលេខាសាងសង់ ដោយមិនទុកយូរនោះឡើយ ៕