(ភ្នំពេញ)៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ​ និងដឹកជញ្ជូននៅ​ ក្នុងវេទិកាសំណេះសំណាល ស្ដីពីចល័តភាពក្នុងទីប្រជុំជន (URBAN MOBILITY FORUM)​ នៅព្រឹកថ្ងៃទី៥ ខែធ្នូ ឆ្នាំ២០១៩នេះ លោកបានមានប្រសាសន៍ថា កំណើនសេដ្ឋកិច្ចរបស់ប្រជាពលរដ្ឋនាពេលបច្ចុប្បន្ននេះ មានការរីកលូតលាស់យ៉ាងឆាប់រហ័ស ដែលធ្វើអោយប្រជាពលរដ្ឋមានលទ្ធភាពគ្រប់គ្រាន់ក្នុងការទិញសម្ភារៈប្រើប្រាស់នានាបាន។ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ​ និងដឹកជញ្ជូន បានបន្តថា ការរីកលូតលាស់នៃកំណើនសេដ្ឋកិច្ចរបស់ប្រជាពលរដ្ឋយ៉ាងឆាប់រហ័សបែបនេះ បានធ្វើអោយកំណើន នៃការប្រើប្រាស់យានយន្ត និងម៉ូតូរបស់ប្រជាពលរដ្ឋ មានការកើនឡើងគួរអោយកត់សម្គាល់។ឯកឧត្តមបន្តថា ជាក់ស្តែងក្នុងមួយឆ្នាំ ប្រជាពលរដ្ឋទូទាំងប្រទេសទិញម៉ូតូជាង៣០ម៉ឺនគ្រឿង ដែលជាអត្រាមួយខ្ពស់គួរសមសម្រាប់កម្ពុជាក្នុងរយៈកាលប៉ុន្មានឆ្នាំនេះ ហើយដែលកំណើនយានជំនិះច្រើនបែបនេះហើយ ដែលជាហេតុធ្វើឲ្យបញ្ហាកកស្ទះចរាចរណ៍នៅកម្ពុជា មានតែជាបញ្ហាប្រឈមដែលត្រូវដោះស្រាយ។ ឆ្លើយតបទៅនិងក្រុមអ្នកសារព័ត៌មាន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ​ និងដឹកជញ្ជូន បានមានប្រសាសន៍បន្តថា ក្រសួងសាធារណការ​ និងដឹកជញ្ជូន នឹងបន្តខិតខំប្រឹងប្រែងធ្វើយ៉ាងណាកែប្រែស្ថានភាពផ្លូវ គំនូសផ្លូវ ស្លាកសញ្ញាចរាចរណ៍ អោយកាន់តែល្អបន្ថែមទៀត ដើម្បីធ្វើយ៉ាងណាអោយប្រជាពលរដ្ឋបានយល់ដឹងកាន់តែច្បាស់ ក្នុងការកាត់បន្ថយការកកស្ទះចរាចរណ៍នៅកម្ពុជា។