ផ្សព្វផ្សាយ និងបញ្ជ្រាបការយល់ដឹងអំពីសុវត្ថិភាពចរាចរណ៍ផ្លូវគោកដល់ប្រជាពលរដ្ឋក្នុងខេតុ្តត្បូងឃ្មុំ ត្បូងឃ្មុំ៖ នាថ្ងៃអង្គា ទី១៤ ខែកក្កដា ឆ្នាំ២០២៦ កម្មវិធីផ្សព្វផ្សាយសុវត្ថិភាពចរាចរណ៍ផ្លូវគោក ក្នុងកិច្ចសហការរវាងមន្ទីរសាធារណការ និងដឹកញ្ជូនត្បូងឃ្មុំ ជាមួយសាខាកាកបាទក្រហមកម្ពុជាខេត្ត និងស្នងការនគរបាលខេត្ត ត្រូវបានប្រារព្ធធ្វើឡើង ក្រោមអធិបតីភាពឯកឧត្តម ម៉ា ស៊ុនហួត អនុរដ្ឋលេខាធិការ ក្រសួងសាធារណការនិងដឹកជញ្ជូន ព្រមទាំងប្រតិភូអម និងឯកឧត្តម ប៉េង សម្បត្តិ អភិបាលរងនៃគណៈអភិបាលខេត្ត។ ពិធីនេះប្រព្រឹត្តទៅនៅត្រង់ចំណុចប្រសព្វរវាងផ្លូវជាតិលេខ៧ និងផ្លូវជាតិលេខ៧១C ក្នុងឃុំស្រឡប់ ស្រុកត្បូងឃ្មុំ ដែលជាទីតាំងដំឡើងភ្លើងសញ្ញាបញ្ជាចរាចរណ៍(ភ្លើងស្តុប) ដំបូងគេបង្អស់លើទឹកដីខេត្តត្បូងឃ្មុំ ក្រោមជំនួយរបស់ក្រុមហ៊ុនសាងសង់ផ្លូវជាតិលេខ៧១C។ ក្រោយទទួលបានមតិសំណេះសំណាលនិងផ្តាំផ្ញើរបស់គណៈអធិបតី ក្រុមការងារក៏បានចែកឯកសារ និងខិតបណ្ណផ្សព្វផ្សាយរួមមាន៖ ១)-ស្ទីកឃ័រ ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍ចំនួន៥ផ្ទាំង ២)-ផ្ទាំងសញ្ញាសិទ្ធិអាទិភាព១០ផ្ទាំង ៣)-ផ្ទាំងថ្មើរជើង១០ផ្ទាំង ៤)-ផ្ទាំងកាត់ទ្រុងរថយន្ត១០ផ្ទាំង ៥)-ផ្ទាំងសញ្ញាចរាចរណ៍១០ផ្ទាំង ៦)-សៀវភៅដែលអ្នកជិះម៉ូតូគួរយល់ដឹង៤០០ក្បាល ៧)-សៀវភៅច្បាប់ចរាចរណ៍ផ្លូវគោក១០០ក្បាល ៨)-ស្ទីកឃ័រចំណាំងផ្លាត១០០សន្លឹក ៩)-ខិតបណ្ណសុវតិ្ថភាពចរាចរណ៍ ៤០០សន្លឹក ១០)-ជំនួយស្មារតីច្បាប់ស្តីពីចរាចរណ៍ផ្លូវគោក(បត់បីផ្នត់)៤០០សន្លឹក និង ១១-មួកសុវត្ថិភាពចំនួន២០៕