ថ្ងៃសុក្រ ៥កើត ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០១ ខែវិច្ឆិកា ឆ្នាំ២០១៩ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារក្រសួង អញ្ជើញចុះត្រួតពិនិត្យវឌ្ឍនភាពនៃការសាងសង់ ការតបណ្ដាញលូ និងការស្ដារប្រឡាយទីមួយ នៅក្រុងតាខ្មៅ ខេត្តកណ្ដាល។ គោលបំណងក្នុងការចុះពិនិត្យនេះ គឺដើម្បីតាមដាន ពិនិត្យជាក់ស្តែងពីបច្ចេកទេស និងវឌ្ឍនភាពនៃការសាងសង់ប្រឡាយបង្ហូរទឹកទី១ ដែលមានប្រវែង១៤០០ម៉ែត្រ ស្ថិតនៅក្នុងសង្កាត់កំពង់សំណាញ់ ក្រុងតាខ្មៅ ខេត្តកណ្តាល ហើយគ្រោងនឹងរួចរាល់នៅមុនចូលឆ្នាំខ្មែរខាងមុខនេះ។ ប្រឡាយនេះនឹងចូលរួមចំណែកក្នុងការបង្កើននូវសុខុមាលភាពរបស់ប្រជាពលរដ្ឋ អនាម័យល្អ បរិស្ថានស្រស់បំព្រង ការពារទឹកជំនន់ និងការទាក់ទាញភ្ញៀវទេសចរ ក៏ដូចជាវិនិយោគិនជាតិ និងអន្តរជាតិ ៕