ថ្ងៃពុធ ១២រោច ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៥ ខែកញ្ញា ឆ្នាំ២០១៩ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជួបសំណេះសំណាលជាមួយនិវត្តជន ក្រសួងសាធារណការ និងដឹកជញ្ជូន ប្រមាណ២៧០នាក់ ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ឆ្នាំកុរ ឯកស័ក ពុទ្ធសករាជ ២៥៦៣ ដោយមានការចូលរួមពីថ្នាក់ដឹកនាំក្រសួង មន្ត្រីរាជការក្រោមឱវាទក្រសួងផងដែរ។ ឯកឧត្តមទេសរដ្ឋមន្ត្រី បានគូសបញ្ជាក់អំពីសមិទ្ធផលការងារដែលសម្រេចបានរបស់ក្រសួង ក៏ដូចជារបស់រាជរដ្ឋាភិបាល និងគម្រោងសំខាន់ៗកំពុងបន្តមួយចំនួនទៀតពាក់ព័ន្ធនឹងកម្មវិធីកំណែទម្រង់ក្នុងគោលដៅធ្វើយ៉ាងណាជំរុញសេវាសាធារណៈឱ្យបានឆាប់រហ័ស មានតម្លាភាព ប្រសិទ្ធភាព ដើម្បីបង្ខិតសេវាទាំងនោះទៅកៀកប្រជាពលរដ្ឋ តាមរយៈការធ្វើទំនើបកម្មប្រព័ន្ធស្វ័យប្រវត្តិកម្ម នៅក្នុងយុគសម័យបច្ចេកវិទ្យានេះ។ ឯកឧត្ដមទេសរដ្ឋមន្ត្រី បានសំណូមពរឱ្យបងប្អូននិវត្តជនទាំងអស់រួបរួមសាមគ្គីគ្នាជាធ្លុងមួយនៃមហាគ្រួសារខ្មែរ កុំជឿតាមការញុះញង់ពីសំណាក់ពួកជនអគតិដែលតែងតែបំភិតបំភ័យ និងភូតភរ គ្រប់រូបភាព គ្មានសីលធម៌ ដើម្បីផ្តួលរំលំរាជរដ្ឋាភិបាលស្របច្បាប់ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ជាមួយគ្នានេះផងដែរ ឯកឧត្ដមទេសរដ្ឋមន្ត្រី បានសន្យានឹងជួយស្វែងរកថវិកាបន្ថែមដើម្បីជួយទ្រទ្រង់ដល់សមាគមនិវត្តជនបន្តទៀត ដោយមិនទុកឱ្យពួកគាត់អស់សង្ឃឹមរស់នៅក្នុងភាពឯកោ និងបានផ្តាំផ្ញើឱ្យពួកគាត់ទាំងអស់ថែរក្សាសុខភាពឱ្យបានខ្ជាប់ខ្ជួន ដើម្បីជួយផ្តល់ប្រឹក្សាយោបល់ និងបទពិសោធន៍ដល់ក្មេងៗជំនាន់ក្រោយ សម្រាប់អភិវឌ្ឍវិស័យសាធារណការ និងដឹកជញ្ជូនកម្ពុជាឱ្យមានការរីកចម្រើនជាបន្តទៀត។ ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី ក៏បាននាំយកអំណោយជាថវិកាមួយចំនួនឧបត្ថម្ភដល់និវត្តជនគ្រប់ៗរូប ដើម្បីជាបច្ច័យធ្វើបុណ្យឧទ្ទិសកុសលផលបុណ្យដល់ដួងវិញ្ញាណក្ខន្ធ ជីដូន ជីតា បុព្វការីជន ញាតិការទាំង៧សន្តាន ដែលបានចែកឋានទៅកាន់បរលោក នៅក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ និងបានជូនពរសូមឱ្យនិវត្តជនទាំងអស់ជួបប្រទះតែសុខសុវត្ថិភាព មានស្មារតីនិងអារម្មណ៍ជ្រះថ្លា ដើម្បីចូលរួមអភិវឌ្ឍប្រទេសជាតិយើងឱ្យមានភាពចម្រុងចម្រើនថែមមួយកម្រិតទៀត ៕