ខេត្តព្រះវិហារ៖ប្រធានមន្ទីរសាធារណការនិងដឹកជញ្ជូនខេត្តព្រះវិហារលោកសំលាងទ្រីរួមជាមួយថ្នាក់ដឹកនាំមន្ត្រីរាជការក្រោមឱវាទកាលពីព្រឹកថ្ងៃទី២២ខែកញ្ញាឆ្នាំ២០១៩នេះដែលត្រូវនឹងថ្ងៃកាន់វឹនបិណ្ឌទី៩បានមូលមតិគ្នាជាឯកច្ឆន្ទរៀបចំកាន់វេនបិណ្ឌដោយបាននាំចង្ហាន់បាយសម្លម្ហូបអាហារយកមកប្រគេនព្រះសង្ឃដែលគង់ចាំព្រះវស្សានៅវត្តទ្រីសុទ្ធារាមហៅវត្តសង្កែពីរស្ថិតក្នុងភូមិសំបូរឃុំសង្កែពីរស្រុកឆែបខេត្តព្រះវិហារ។ នៅក្នុងឱកាសនោះលោកប្រធានមន្ទីរនិងក្រុមការងារព្រមទាំងថ្នាក់ដឹកនាំមន្ត្រីរាជការបានប្រារព្វពិធីបង្សុកូលឧទ្ទិសកុសលផលបុណ្យជូនដល់ដួងវិញ្ញាណក្ខន្ធដូនតាសាច់សាលោហិតញាតិការទាំង៧សន្តានឧបុព្វការីជនដែលបានចែកឋាននិងបុព្វបុរសស្នេហាជាតិដែលបានលះបង់ជីវិតដើម្បីជាតិមាតុភូមិនិងប្រជាជនសូមឲ្យបានទៅសោយសុខក្នុងឋានបរមសុខនិងសុគតិភពតរៀងទៅ។ ក្រោយពីបានរាប់បាត្រវេរប្រគេនបច្ច័យទេយ្យវត្ថុនិងទេយ្យទានរួចមកលោកសំលាងទ្រីបានធ្វើការបួងសួងសុំសេចក្តីសុខសេចក្តីចម្រើននិងសិរីសួស្តីចូលមានដល់បងប្អូនពុទ្ធបរិស័ទចំណុះជើងវត្តទ្រីសុទ្ធារាមនិងបងប្អូនទូទាំងឃុំសង្កែពីរនិងជនរួមជាតិទាំងនៅទីជិតទីឆ្ងាយគ្រប់ៗគ្នាសូមទទួលបានសេចក្តីសុខជារៀងរហូត។ លោកសំលាងទ្រីក៏បានថ្លែងអំណរគុណដល់ក្រុមការងារគ្រប់លំដាប់ថ្នាក់អាជ្ញាធរមូលដ្ឋានបងប្អូនប្រជាពុទ្ធបរិស័ទទាំងអស់ដែលបានសហការរៀបចំពិធីកាន់បិណ្ឌនាថ្ងៃនេះបានយ៉ាងល្អប្រសើររៀបរយសណ្តាប់ធ្នាប់ស្លៀកពាក់សមសួនតាមបែបប្រពៃណីនិងព្រះពុទ្ធសាសនាដែលជាសាសនារបស់ជាតិយើង។ ទិដ្ឋភាពទាំងអស់នេះបានបង្ហាញឲ្យឃើញយ៉ាងប្រត្យក្សពីភាពសុខសាន្តនិងជីវភាពសម្បូរណ៌សប្បាយមានសេចក្តីសុខសេចក្តីចម្រើនសុភមង្គលនិងសុខដុមរមនាក្នុងសង្គមជាតិខ្មែរទាំងមូល។ទាំងអស់នេះគឺដោយសារម្លប់សុខសន្តិភាពស្ថិរភាពនិងការអភិវឌ្ឍរបស់ប្រទេសជាតិយើងស្ថិតក្រោមការដឹកនាំដ៏ត្រឹមត្រូវរបស់រាជរដ្ឋាភិបាលដែលមានសម្តេចតេជោហ៊ុនសែនជានាយករដ្ឋមន្រ្តី។ហេតុនេះលោកស្នើសុំឲ្យបងប្អូនពុទ្ធបរិស័ទគ្រប់រូបជួយថែរក្សាឲ្យបានគង់វង្សមាំមួនល្អនូវសមិទ្ធផលទាំងអាណាចក្រនិងពុទ្ធចក្រ។ លោកប្រធានមន្ទីរក៍បានផ្តាំផ្ញើដល់បងប្អូនប្រជាពលរដ្ឋលោកតាលោកយាយត្រូវរួមគ្នាថែរក្សាសុខសន្តិភាពអោយបានគង់វង្សយូរអង្វែងដោយមិនត្រូវជឿតាមញុះញុងណាមួយរបស់ទណ្ឌិតសមរង្សីដែលមានបំណងបង្ករអសន្តិសុខនៅក្នុងប្រទេសពិសេសគឺបានធ្វើការប្រមាថយ៉ាងធ្ងន់ធ្ងរដល់អង្គព្រះមហាក្សត្រជាទីគោរពសក្ការះរបស់ប្រជារាស្ត្រខ្មែរគ្រប់ៗរូប៕