[Swift news daily] - សម្តេចក្រឡាហោម ស ខេង ចូលរួមក្នុងទិវាសប្តាហ៍ជាតិសុវត្ថិភាពចរាចរណ៍ លើកទី១២ នៅខេត្តត្បូងឃ្មុំ
2019-06-11
ទៅកាន់ទំព័រចុះផ្សាយក្នុង Swift news daily
(ខេត្តត្បូងឃ្មុំ)៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីក្នុងទិវាសប្តាហ៍ជាតិសុវត្ថិភាពចរាចរណ៍ លើកទី១២ នាព្រឹកថ្ងៃទី១១ ខែមិថុនា ឆ្នាំ២០១៩ នៅស្រុកពញាក្រែក ខេត្តត្បូងឃ្មុំ។
សម្តេចក្រឡាហោម ស ខេង បានលើកឡើងថា ទិវាសប្តាហ៍ជាតិសុវត្ថិភាពចរាចរណ៍ ត្រូវបានអង្គការសហប្រជាជាតិ ប្រារព្ធឡើងរៀងរាល់ឆ្នាំ នៅក្នុងខែឧសភា។ នៅឆ្នាំ២០១៩នេះ អង្គការសហប្រជាជាតិ បានកំណត់ធ្វើ នៅចន្លោះពីថ្ងៃទី១ ដល់ថ្ងៃទី១២ ខែឧសភា ឆ្នាំ២០១៩ ដើម្បីរម្លឹកដល់ប្រជាពលរដ្ឋ ក្នុងពិភពលោក ពិសេសប្រទេសក្នុងតំបន់អាស៊ីប៉ាស៊ីហ្វិក រួមទាំងកម្ពុជាយើងផងដែរ ឲ្យយកចិត្តទុកដាក់ចំពោះសុវត្ថិភាពចរាចរណ៍។
សម្តេចក្រឡាហោម ស ខេង បន្តថា ទិវាសប្តាហ៍ជាតិសុវត្ថិភាពចរាចរណ៍ ក៏ជាកម្មវិធីនយោបាយរបស់រាជរដ្ឋាភិបាលកម្ពុជាយើង ក្នុងការលុបបំបាត់ទុក្ខវេទនា ក៏ដូចជាអនុវត្តឲ្យបានជោគជ័យនូវទសវត្សរ៍សុវត្ថិភាពចរាចរណ៍ផ្លូវគោក ឆ្នាំ២០១១ ដល់ឆ្នាំ២០២០ របស់អង្គការសហប្រជាជាតិ។ ឆ្នាំនេះ គឺជាឆ្នាំទី១២ ដែលកម្ពុជារៀបចំទិវាសប្តាហ៍សុវត្ថិភាពចរាចរណ៍ផ្លូវគោក ដើម្បីសំដៅបំផុសស្មារតីរបស់បងប្អូនប្រជាពលរដ្ឋ ឲ្យចូលរួមប្រុងប្រយ័ត្ន និងកាត់បន្ថយ ជៀសវាងគ្រោះថ្នាក់ចរាចរណ៍ផ្លូវគោក៕
