ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួង សាធារណការ និងដឹកជញ្ជូន បានអញ្ជើញចូលរួម កិច្ចប្រជុំប្រចាំឆ្នាំលើកទី៨១ របស់គណៈកម្មាធិការដឹកជញ្ជូនផ្លូវគោក នៅអង្គការសហប្រជាជាតិ(UN)លើកទី៨១ ចាប់ពីថ្ងៃទី១៩-២២ ខែកុម្ភៈ ឆ្នាំ២០១៩ នៅUN នាទីក្រុងហ្សឺណែវ ប្រទេសស្វីស។ កិច្ចប្រជុំមានការចូលរួម ដោយរដ្ឋមន្រ្តីដឹកជញ្ជូន និងប្រធានគណៈប្រតិភូមកពី ទី្វប អាហ្រ្វិក អាស៊ី អឺរ៉ុប និងមជ្ឈិមបូព៌ា និងអង្គការអន្តរជាតិពាក់ព័ន្ធនានាជាច្រើន។ កាលពីថ្ងៃទី១៩ កុម្ភៈ កិច្ចប្រជុំបានអនុម័ត លើសេចក្តីសម្រេច ស្តីពីការលើកកម្ពស់កិច្ចសហប្រតិបត្តិការ សុខដុមនីយ កម្ម និងសមាហរណកម្ម នៅក្នុងយុគសម័យស្វ័យប្រវត្តិ កម្មដឹកជញ្ជូន។ ជាមួយគ្នានេះ កិច្ចប្រជុំប្រចាំឆ្នាំលើកទី៨១ របស់គណៈកម្មាធិការដឹកជញ្ជូនផ្លូវគោក ក៏បានអនុម័តយុទ្ធសាស្រ្ត របស់គណៈកម្មាធិការដឹកជញ្ជូនផ្លូវគោក អង្គការសហប្រជាជាតិឆ្នាំ២០៣០ ផែនការសកម្មភាព និងរបៀបរបបការងារកែសម្រួល របស់គណៈកម្មាធិការ៕