ថ្នាក់ដឹកនាំ និងជំនាញ នៃក្រសួងសាធារណការ និងដឹកជញ្ជូន ចូលរួមវគ្គបណ្តុះបណ្តាល និងទស្សនកិច្ចសិក្សាស្តីពី “Capacity Building in Pavement Technology” នៅទីក្រុងសេអ៊ូល នៃសាធារណរដ្ឋកូរ៉េ កូរ៉េខាងត្បូង៖ ថ្ងៃទី៦ ដល់ ថ្ងៃទី១១ ខែកក្កដា ឆ្នាំ២០២៧ ឯកឧត្តមបណ្ឌិត ឈុន គានថៃ ទីប្រឹក្សាក្រសួងសាធារណការ និងដឹកជញ្ជូន និងជាទីប្រឹក្សាវិទ្យាស្ថានតេជោសែន សាធារណការ និងដឹកជញ្ជូន បានដឹកនាំមន្ត្រីជំនាញ វិទ្យាស្ថាន អគ្គនាយកដ្ឋានសាធារណការ និង អគ្គនាយកដ្ឋានបច្ចេកទេស ចូលរួមវគ្គបណ្តុះបណ្តាល និងទស្សនកិច្ចសិក្សាស្តីពី “Capacity Building in Pavement Technology” នៅទីក្រុងសេអ៊ូល សាធារណរដ្ឋកូរ៉េ។ វគ្គបណ្ដុះបណ្ដាល និងទស្សនកិច្ចសិក្សានេះ មានគោលបំណងសំខាន់ៗចំនួន៣ រួមមាន៖ ១).ដើម្បីលើកកម្ពស់សមត្ថភាពបច្ចេកទេស ពង្រឹងចំណេះដឹង ជំនាញ និងសមត្ថភាពរបស់មន្ត្រីជំនាញ លើបច្ចេកវិទ្យាសាងសង់ ត្រួតពិនិត្យគុណភាព និងថែទាំកម្រាលផ្លូវ (Pavement Technology) ឱ្យស្របតាមស្តង់ដារបច្ចេកទេសកម្រិតខ្ពស់ ២).ផ្លាស់ប្តូរបទពិសោធន៍ ដើម្បីសិក្សាស្វែងយល់ផ្ទាល់ពីប្រព័ន្ធគ្រប់គ្រងផ្លូវថ្នល់ដ៏ទំនើបរបស់កូរ៉េ ជាពិសេសការប្រើប្រាស់បច្ចេកវិទ្យា និងសម្ភារៈថ្មីៗដែលអាចធន់នឹងការដឹកជញ្ជូន និងការប្រែប្រួលអាកាសធាតុ និង ៣).គាំទ្រដើម្បីជំរុញការអនុវត្តគម្រោង ប្រព្រឹត្តទៅប្រកបដោយប្រសិទ្ធភាពខ្ពស់ និងសម្រេចបានតាមគោលដៅដែលបានកំណត់។ សូមជម្រាបជូនថា វគ្គបណ្តុះបណ្តាល និងទស្សនកិច្ចសិក្សានេះ រៀបចំឡើង ក្រោមគម្រោង ធ្វើឱ្យមានភាពប្រសើរឡើងនៃប្រព័ន្ធសាងសង់ និងគ្រប់គ្រងផ្លូវថ្នល់នៅកម្ពុជា ដំណាក់កាលទី២ (២០២៥-២០២៨) (Extension Project of Road Construction and Management System in Cambodia)ដែលជាគម្រោងជំនួយហិរញ្ញប្បទានឥតសំណងពីរដ្ឋាភិបាល នៃសាធារណរដ្ឋកូរ៉េ ដែលមានវិទ្យាស្ថានតេជោសែន សាធារណការ និងដឹកជញ្ជូន ជាអ្នកអនុវត្តគម្រោង៕