[Post khmer] - Uber ប្រកាសដំណើរការសេវារថយន្តតាក់ស៊ី
2017-09-29
ទៅកាន់ទំព័រចុះផ្សាយក្នុង Post khmer
ភ្នំពេញៈ Uber ដែលជាសេវាហៅរថយន្តតាក់ស៊ីជិះធំជាងគេរបស់ពិភពលោក បានបើកដំណើរការជាផ្លូវការនៅរាជធានីភ្នំពេញកាលពីម្សិលមិញ បន្ទាប់ពីការសាកល្បងរយៈពេល ៣ ខែ ដោយមានការសម្របសម្រួលដោយផ្ទាល់ជាមួយក្រសួងសាធារណការនិងដឹកជញ្ជូន ដើម្បីបង្កើតបទប្បញ្ញត្តិថ្មីមួយក្នុងការធ្វើឲ្យប្រតិបត្តិការរបស់ខ្លួនទទួលបានជោគជ័យ។
លោក Brooks Entwistle មន្ដ្រីពាណិជ្ជកម្មអាស៊ីប៉ាស៊ីហ្វិករបស់ក្រុមហ៊ុន បានឲ្យដឹងថា ការដំណើរការជាផ្លួវការនៅទីក្រុងភ្នំពេញគឺជាសមិទ្ធផលដ៏ធំសម្រាប់ក្រុមហ៊ុននេះ ដែលធ្វើឲ្យកម្ពុជាក្លាយជាប្រទេសទី៨នៅក្នុងផលបត្រពិភពលោករបស់ខ្លួន ហើយបានលើកឡើងថា ការគាំទ្រ «យ៉ាងរហ័ស និងការគិតឆ្ពោះទៅមុខ»របស់រដ្ឋាភិបាល ដល់បទប្បញ្ញត្តិគឺជាគន្លឹះដ៏សំខាន់ក្នុងការត្រួសត្រាយផ្លូវសម្រាប់ការចូលរបស់ខ្លួននៅក្នុងទីផ្សារកម្ពុជា។
លោកថ្លែងថា៖ «ការដំណើរការនេះបង្ហាញពីសម្ទុះនៅទូទាំងអាស៊ីអាគ្នេយ៍របស់យើង។ ប៉ុន្តែ យើងមិនអាចធ្វើបានដោយមិនមានការគាំទ្រពីរដ្ឋាភិបាលកម្ពុជានោះទេ»។
លោកបន្ថែមថា ជាមួយប្រតិបត្តិការពេញលេញរួចហើយនោះលោកសង្ឃឹមថា ក្រុមហ៊ុន Uber អាចទទួលបានជាវិជ្ជមានដោយសារការស្ទះផ្លូវនៅទីក្រុង ខណៈវាបានផ្ដល់មធ្យោបាយក្នុងតម្លៃសមរម្យសម្រាប់អ្នកជិះ និងការផ្ដល់ឲ្យអ្នកបើកបរពីរបៀបរកប្រាក់ចំណូលបានកាន់តែច្រើន ទោះបីជាពួកគេទាំងនោះធ្វើការងារពេញម៉ោងឬក្រៅម៉ោងក៏ដោយ។
លោកបន្តថា៖«បច្ចេកវិទ្យាដែលក្រុមហ៊ុន Uber ប្រើប្រាស់សម្រាប់ការហៅរថយន្តជិះបានផ្លាស់ប្តូរទីក្រុងជាច្រើនលើពិភពលោក ហើយជាពិសេសនៅក្នុងតំបន់អាស៊ីអាគ្នេយ៍ [អនុញ្ញាតឲ្យប្រជាជន] ធ្វើដំណើរកាន់តែមានប្រសិទ្ធភាព»។ លោកបន្ថែមថា៖ «យើងកំពុងផ្លាស់ប្តូររបៀបដែលប្រជាជនធ្វើដំណើរជុំវិញទីក្រុងជាច្រើន»។
ខណៈ លោក Entwistle មិនបាននិយាយថា មានអ្នកបើកបរប៉ុន្មាននាក់ដែលក្រុមហ៊ុនបានជ្រើសរើសសម្រាប់ក្រុមហ៊ុននេះទេ តែការស្វែងរកនៅលើកម្មវិធីទូរស័ព្ទចល័តជុំវិញតំបន់កោះពេជ្រ បានបង្ហាញអ្នកបើកបរ៨នាក់។
បទប្បញ្ញត្តិដ៏សំខាន់ដែលជួយគាំទ្រដល់ប្រតិបត្តិការរបស់ក្រុមហ៊ុន Uber គឺថា កម្មវិធីនេះត្រូវបានអនុញ្ញាតឲ្យប្រើប្រាស់ដោយអ្នកបើកបរតាក់ស៊ីដែលមានស្រាប់ ដែលធ្វើការឲ្យក្រុមហ៊ុនក្នុងស្រុក ជាការបន្ថែមលើសេវាដោយមិនរំលោភលើកិច្ចព្រមព្រៀងបុគ្គលិក និងថៅកែទេ។
លើសពីនេះ MPWT បានជំរុញនីតិវិធីរបស់ខ្លួនសម្រាប់ការបញ្ជាក់លើអ្នកបើកបរស្របច្បាប់ ដែលមានប័ណ្ណបើកបរមានសុពលភាព ហើយបង្ហាញថា ពួកគេមានកំណត់ត្រាតាមដានសុវត្ថិភាពដោយមិនមានសិក្ខាសាលាបណ្ដុះបណ្ដាលដែលចំណាយប្រាក់ច្រើន និងប្រើប្រាស់ពេលវេលា។
លោក ផែង សុវិជ្ជានោ រដ្ឋលេខាធិការ ក្រសួងសាធារណការ និងដឹកជញ្ជូន បានឲ្យដឹងថា ការសហការរយៈពេល៦ខែ ជាមួយក្រុមហ៊ុន Uber បានបង្ហាញពីការប្ដេជ្ញាចិត្តរបស់ រដ្ឋាភិបាលក្នុងការជំរុញឲ្យមានប្រព័ន្ធដឹកជញ្ជូនដ៏ទំនើបប្រកបដោយសុវត្ថិភាព និងជឿទុកចិត្តសម្រាប់ប្រទេសនេះ»។
លោកថ្លែងថា៖ «ការដំណើរការសេវា Uber បង្ហាញពីរបៀបដែលរដ្ឋាភិបាល និងឧស្សាហកម្មអាចធ្វើការងារជាមួយគ្នាក្នុងការទាញយកអត្ថប្រយោជន៍នៃបច្ចេកវិទ្យាថ្មី»។
លោក William Heidt ឯកអគ្គរដ្ឋទូតអាមេរិក ដែលធ្វើជាអធិបតីក្នុងព្រឹត្តិការណ៍នេះ បានសរសើរដល់ឱកាសសេដ្ឋកិច្ច ដែល Uber ផ្ដល់សម្រាប់អ្នកបើកបរ និងការផ្ដល់សញ្ញាពី របៀបដែលរដ្ឋាភិបាលអាចមានការវិនិយោគរួមប្រកបដោយផ្លែផ្កាជាមួយក្រុមហ៊ុនអាមេរិក។
លោក Valentin Vermersch អ្នកដំណើរការផ្នែកអន្តរជាតិសម្រាប់ Uber បានឲ្យដឹងថា ក្រុមហ៊ុននេះនឹងត្រូវបានជំរុញដោយភាពជាដៃគូយុទ្ធសាស្ដ្រជាមួយ Smart Axiata ជាប្រតិបត្តិករទូរស័ព្ទចល័ត ដែលបានប្ដេជ្ញាចិត្តក្នុងការអនុញ្ញាតឲ្យបើកបរទទួលបានទិន្នន័យអ៊ីនធឺណិតដោយមិនគិតប្រាក់ នៅពេលពួកគេកំពុងធ្វើការងារ។
លោកបានថ្លែងថា៖ «ដោយមានការគាំទ្ររបស់ Smart យើងអាចធានាថា អ្នកបើកបរទទួលបានកញ្ចប់ទិន្នន័យដែលមិនគិតប្រាក់នៅពេលប្រតិបត្តិការ»។
លោកបន្ថែមថា ព័ត៌មានលម្អិតបន្ថែមនៃភាពជាដៃគូនេះនឹងត្រូវបានប្រកាសក្នុងពេលឆាប់ៗនេះ។
លើសពីនេះ លោកបានបង្ហាញហេតុផលដែលក្រុមហ៊ុននេះបានដំណើរការនៅទីក្រុងភ្នំពេញ ទោះបីជាការពិតដែលថា ទីក្រុងនេះមានកម្មវិធីហៅរថយន្តជិះថ្មីៗ ដូចជា Exnet Cambodia និង PassApp ក៏ដោយ។
លោកថ្លែងថា៖ «ប្រទេសកម្ពុជាមានការតភ្ជាប់ទូរស័ព្ទចល័តដ៏ល្អ ដែលជាកំណើននៃអ្នកចេះប្រើប្រាស់បចេ្ចកវិទ្យា ហើយបានរក្សាកំណើនសេដ្ឋកិច្ចប្រកបដោយស្ថិរភាព»។
លោកបន្ថែមថា ខណៈបច្ចុប្បន្នកម្មវិធីនេះសម្រាប់តែតាក់ស៊ី Uber នឹងពិចារណាលើការបើកចំហកម្មវិធីដល់រ៉ឺម៉កម៉ូតូ និងម៉ូតូនៅពេលអនាគតផងដែរ។
លោកថ្លែងថា៖ «ដំបូងយើងចាំបាច់ត្រូវធានាឲ្យប្រាកដថា អ្នកបើកបរទាំងអស់របស់ក្រុមហ៊ុន Uber អាចឆ្លើយតបតាមលក្ខណសម្បត្តិគ្រប់គ្រាន់សម្រាប់លក្ខខណ្ឌសុវត្ថិភាពជាក់លាក់ដែលយើងមាន ប៉ុន្តែយើងជឿជាក់ថា មានសក្ដានុពលទីផ្សារដ៏ធំសម្រាប់ក្រុមហ៊ុននេះ»។
ក្នុងពេលឆាប់ៗនេះ Uber អាចប្រឈមនឹងការប្រកួតប្រជែងយ៉ាងខ្លាំងពីក្រុមហ៊ុន Grab ជាកម្មវិធីហៅរថយន្តជិះធំជាងគេរបស់អាស៊ីអាគ្នេយ៍ ដែលបានបង្ហាញចំណាប់អារម្មណ៍របស់ខ្លួនក្នុងការចូលក្នុងទីផ្សារកម្ពុជាភ្លាមៗបន្ទាប់ពីកិច្ចប្រជុំជាមួយមន្ដ្រីរដ្ឋាភិបាលកាលពីដើមសប្ដាហ៍នេះ ដើម្បីពិភាក្សាលើបទប្បញ្ញត្តិក្នុងស្រុក និងនីតិវិធីផ្ដល់អាជ្ញាប័ណ្ណ៕
