កិច្ចប្រជុំពិភាក្សាដើម្បីប្រមូលធាតុចូលបន្ថែមលើគំនូសប្លង់វិស្វកម្មលម្អិតរបស់ស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិទាំង៤កន្លែង នៃគម្រោង 3CEP ទីស្ដីការក្រសួង៖ នាថ្ងៃព្រហស្បតិ៍ ទី១៦ ខែកក្កដា ឆ្នាំ២០២៦ លោកជំទាវ ឥម នីថារ៉ា រដ្ឋលេខាធិការ និងជានាយកគម្រោង បានអញ្ជើញដឹកនាំកិច្ចប្រជុំពិភាក្សា (កម្រិតអន្តរក្រសួង-ស្ថាប័ន) ដើម្បីប្រមូលធាតុចូលបន្ថែមលើគំនូសប្លង់វិស្វកម្មលម្អិតរបស់ស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិទាំង៤កន្លែង នៃគម្រោង 3CEP ក្រោមក្របខណ្ឌហិរញ្ញប្រទានសហប្រតិបត្តិការពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដោយមានការអញ្ជើញចូលរួមពី ឯកឧត្តម លោកជំទាវ ថ្នាក់ដឹកនាំគម្រោង 3CEP តំណាងក្រសួងមហាផ្ទៃ តំណាងអគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍នៃក្រសួងសេដ្ឋកិច្ច និងហិរញ្ញវត្ថុ រដ្ឋបាលខេត្តទាំង៤ (តាកែវ រតនគិរី ក្រចេះ ត្បូងឃ្មុំ) អាជ្ញាធរពាក់ព័ន្ធនៅច្រកទ្វារព្រំដែនអន្តរជាតិទាំង៤ (ភ្នំដិន អូរយ៉ាដាវ ត្រពាំងស្រែ និងត្រពាំងផ្លុង) និងតំណាងសម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV ផងដែរ។ គោលបំណងសំខាន់នៃកិច្ចប្រជុំពិភាក្សាកម្រិតអន្តរក្រសួង-ស្ថាប័ននាថ្ងៃនេះ គឺផ្តោតសំខាន់លើការប្រមូលធាតុចូលបន្ថែមសម្រាប់រៀបចំប្លង់គោល ប្លង់ស្ថាបត្យកម្ម រចនាបថសម្រាប់សាងសង់ស្ថានីយ និងហេដ្ឋារចនាសម្ព័ន្ធនានានៅតំបន់ច្រកទ្វារព្រំដែនអន្តរជាតិទាំង ៤កន្លែង របស់គម្រោង 3CEP ដែលរួមមាន៖ ច្រកទ្វារភ្នំដិន ខេត្តតាកែវ ច្រកទ្វារអូរយ៉ាដាវ ខេត្តរតនគិរី ច្រកទ្វារត្រពាំងស្រែ ខេត្តក្រចេះ និងច្រកទ្វារត្រពាំងផ្លុង ខេត្តត្បូងឃ្មុំ។ ជាលទ្ធផល តំណាងអន្តរក្រសួង-ស្ថាប័នបានចូលរួមយ៉ាងផុលផុស និងបានផ្ដល់នូវមតិយោបល់ជាធាតុចូលសំខាន់ៗ សម្រាប់បំពេញបន្ថែមដល់ការរៀបចំគំនូសប្លង់វិស្វកម្មលម្អិតរបស់ស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិទាំង៤កន្លែង ខាងលើ ស្របតាមការជូនដំណឹងរបស់ក្រសួងមហាផ្ទៃកន្លងមក ក៏ដូចជាពិចារណារៀបចំទៅតាមតម្រូវការជាក់ស្ដែងរបស់អាជ្ញាធរពាក់ព័ន្ធប្រចាំនៅច្រកទ្វារព្រំដែន និងស្ថានភាពរំហូរនៃប្រតិបត្តិការដឹកជញ្ជូនឆ្លងកាត់ព្រំដែនរវាងកម្ពុជា-វៀតណាម រួមជាមួយនឹងការគិតគូរដល់ការរៀបចំផែនការអនាគតសម្រាប់អភិវឌ្ឍតំបន់សេដ្ឋកិច្ចពិសេសនៅតំបន់ច្រកទ្វារព្រំដែន និងការតភ្ជាប់ហេដ្ឋារចនាសម្ព័ន្ធផ្លូវដែក ផ្លូវល្បឿនលឿនមកកាន់ច្រកទ្វារព្រំដែន ជាមួយនឹងចក្ខុវិស័យអភិវឌ្ឍច្រកទ្វារព្រំដែនឆ្លាតវៃ (Smart Border Gate) ដោយប្រើប្រាស់បច្ចេកវិទ្យាឌីជីថលថ្មីៗជាគ្រឿងបំពាក់សម្រាប់សម្រួលការងារប្រចាំថ្ងៃនៅតាមច្រកទ្វារព្រំដែនឱ្យបានរហ័ស មានប្រសិទ្ធភាព និងអាចរួមចំណែកជំរុញទំហំពាណិជ្ជកម្មកម្ពុជា-វៀតណាមឱ្យដល់គោលដៅ ២០ពាន់លានដុល្លារអាម៉េរិក។ សូមបញ្ជាក់ជូនបន្ថែមថា៖ គម្រោង 3CEP នេះ នឹងប្រើប្រាស់ហិរញ្ញប្បទានសហប្រតិបត្តិការពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ដែលត្រូវបានរំពឹងទុកថា សមិទ្ធផលនៃគម្រោងនេះ នឹងជួយគាំទ្រដល់វិស័យដឹកជញ្ជូនក្នុងការពង្រឹងការតភ្ជាប់ និងជំរុញកំណើននៃរំហូរប្រតិបត្តិការដឹកញ្ជូនក្នុងតំបន់ភូមិភាគឦសាន និងឆ្លងកាត់ព្រំដែន ប្រកបដោយប្រសិទ្ធភាពនិងប្រសិទ្ធផល។ ជាពិសេស គម្រោងនេះក៏នឹងជំរុញការតភ្ជាប់ និងធ្វើឱ្យប្រសើរឡើងស្ថានីយនិងហេដ្ឋារចនាសម្ព័ន្ធច្រកទ្វារព្រំដែនអន្តរជាតិ(CBF) សម្រួលការដឹកជញ្ជូន ពាណិជ្ជកម្ម ទេសចរណ៍ឆ្លងកាត់ព្រំដែនអន្តរជាតិនិងការតភ្ជាប់សេដ្ឋកិច្ចក្នុងក្របខ័ណ្ឌ៖ (១)-កិច្ចសហប្រតិបត្តិការក្នុងមហាអនុតំបន់មេគង្គ(GMS) (២)-កិច្ចសហប្រតិបត្តិការទ្វេភាគីកម្ពុជា-វៀតណាម (៣)-ចូលរួមចំណែក អនុវត្តផែនការមេ អភិវឌ្ឍតំបន់ភូមិភាគឦសាន (ប៉ូលសេដ្ឋកិច្ចទី៥) និង (៤)-អនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជាផងដែរ៕