កិច្ចប្រជុំពិនិត្យវឌ្ឍនភាពការងាររបស់អគ្គនាយកដ្ឋានប្រព័ន្ធចម្រោះទឹកកខ្វក់ប្រចាំឆមាសទី១ ឆ្នាំ២០២៦ និងការងារគម្រោងហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ និងប្រព័ន្ធលូ ឆ្នាំ២០២៦ ទីស្ដីការក្រសួង៖ នាថ្ងៃពុធ ទី១៥ ខែកក្កដា ឆ្នាំ២០២៦ ឯកឧត្តម រស់ វណ្ណា និងឯកឧត្តម គួច ប៊ុនលាត រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាសហប្រធានដឹកនាំកិច្ចប្រជុំពិនិត្យវឌ្ឍនភាពការងារប្រចាំឆមាសទី១ ឆ្នាំ២០២៦ និងតាមដានវឌ្ឍនភាពការអនុវត្តគម្រោងហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ និងប្រព័ន្ធលូ ឆ្នាំ២០២៦ ដោយមានការចូលរួមពីឯកឧត្តមអនុរដ្ឋលេខាធិការ ឯកឧត្តមអគ្គនាយក លោក-លោកស្រីអគ្គនាយករង ប្រធាន-អនុប្រធាននាយកដ្ឋាន ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងតំណាងមន្ទីរសាធារណការ និងដឹកជញ្ជូនរាជធានី-ខេត្តពាក់ព័ន្ធ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យពិភាក្សា និងវាយតម្លៃលើសមិទ្ធផលការងារដែលសម្រេចបាន បញ្ហាប្រឈម និងទិសដៅការងារបន្ត ដោយផ្តោតលើការពង្រឹងប្រសិទ្ធភាពការគ្រប់គ្រង ការអភិវឌ្ឍហេដ្ឋារចនាសម្ព័ន្ធ និងការលើកកម្ពស់គុណភាពសេវាកម្មប្រព័ន្ធចម្រោះទឹកកខ្វក់ និងប្រព័ន្ធលូ។ បន្ថែមពីនេះ ឯកឧត្ដមរដ្ឋលេខាធិការ បានជំរុញឱ្យអង្គភាពពាក់ព័ន្ធទាំងអស់ បន្តសហការយ៉ាងជិតស្និទ្ធ អនុវត្តការងារឱ្យបានត្រឹមត្រូវតាមផែនការ និងអនុសាសន៍ដែលបានដាក់ចេញ ដើម្បីធានាបាននូវការអភិវឌ្ឍប្រព័ន្ធចម្រោះទឹកកខ្វក់ និងប្រព័ន្ធលូប្រកបដោយប្រសិទ្ធភាព ចីរភាព និងឆ្លើយតបទៅនឹងតម្រូវការអភិវឌ្ឍន៍របស់ប្រទេស។ ជាលទ្ធផលនៃអង្គប្រជុំ ឯកឧត្ដមសហប្រធានអង្គប្រជុំ បានដាក់ចេញនូវអនុសាសន៍ណែនាំសំខាន់ៗ រួមមាន៖ ១).ជំរុញការជ្រើសរើសមន្ត្រីជាប់កិច្ចសន្យា ដើម្បីបំពេញតម្រូវការការងារចាំបាច់ជាបន្ទាន់ និងរៀបចំបញ្ចូលក្នុងផែនការចំណាយប្រចាំឆ្នាំ ស្របពេលមិនទាន់មានការជ្រើសរើសមន្ត្រីក្របខ័ណ្ឌថ្មី ២).រៀបចំវគ្គបណ្តុះបណ្តាលផ្ទៃក្នុង ដោយប្រើប្រាស់មន្ត្រីដែលបានចូលរួមវគ្គបណ្តុះបណ្តាល និងសិក្ខាសាលានៅក្រៅប្រទេស ឬក្នុងប្រទេស ជាអ្នកចែករំលែកចំណេះដឹង និងបទពិសោធន៍ដល់មន្ត្រីក្រោមឱវាទ និងមន្ទីរពាក់ព័ន្ធ ស្របតាមគោលការណ៍ «អ្នកចេះច្រើន បង្រៀនអ្នកចេះតិច»៣).ណែនាំឱ្យមន្ទីរសាធារណការ និងដឹកជញ្ជូនទាំងអស់ រៀបចំផែនការប្រតិបត្តិការ និងថែទាំ (Operation and Maintenance: O&M) ដើម្បីអគ្គនាយកដ្ឋានប្រមូលផ្តុំ និងបញ្ចូលក្នុងផែនការចំណាយប្រចាំឆ្នាំ ៤).ជំរុញការរៀបចំ និងចងក្រងឯកសារស្តង់ដារនីតិវិធីប្រតិបត្តិ (Standard Operating Procedures: SOP) សម្រាប់វាស់វែង និងអនុវត្តការងារជាក់ស្តែង ដើម្បីដាក់ជូនឯកឧត្តមរដ្ឋមន្ត្រីពិនិត្យ និងចុះហត្ថលេខា ប្រែក្លាយជាលិខិតបទដ្ឋានគតិយុត្តផ្លូវការ ៥).រៀបចំផែនការផ្សព្វផ្សាយច្បាប់ស្តីពីការគ្រប់គ្រងទឹកកខ្វក់ ឱ្យបានទូលំទូលាយនៅតាមរាជធានី-ខេត្ត ដើម្បីលើកកម្ពស់ការយល់ដឹង និងការអនុវត្តប្រកបដោយប្រសិទ្ធភាព។ និង៦).រក្សាលទ្ធភាពដំឡើងប្រព័ន្ធថាមពលពន្លឺព្រះអាទិត្យ (Solar Energy) ជាពិសេសសម្រាប់គម្រោងថ្មីៗ ដើម្បីកាត់បន្ថយការចំណាយថាមពលអគ្គិសនី និងបង្កើនប្រសិទ្ធភាពនៃការប្រតិបត្តិការ៕