ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ រួមជាមួយថ្នាក់ដឹកនាំសហគមន៍ឥស្លាមនៅកម្ពុជា ក្រុមហ៊ុន ស៊ូកាកូ អ៊ិន (Shukaku Inc.) និងសណ្ឋាគារភ្នំពេញ បានសម្រេចឯកភាពគ្នាជាផ្លូវការ លើការបើកតម្រាយផ្លូវ R4 ដែលតភ្ជាប់ពីតំបន់បឹងកក់ ឆ្ពោះមកកាន់មហាវិថីព្រះមុនីវង្ស ដើម្បីសម្រួលដល់ការធ្វើដំណើរ និងជួយកាត់បន្ថយការកកស្ទះចរាចរណ៍។យោងតាមការចេញផ្សាយដោយក្រសួងសាធារណការ និងដឹកជញ្ជូន កាលពីថ្ងៃទី១៩ ខែមិថុនា ឆ្នាំ២០២៦ បានឱ្យដឹងថា កិច្ចពិភាក្សាលើគម្រោងបើកផ្លូវ R4 នេះ បានប្រព្រឹត្តទៅដោយរលូន ក្រោមការចូលរួមពីគ្រប់ភាគីពាក់ព័ន្ធ ទាំងស្ថាប័នរដ្ឋ តំណាងសហគមន៍ និងវិស័យឯកជន។ គោលបំណងសំខាន់នៃការបើកតម្រាយផ្លូវថ្មីនេះ នឹងជួយសម្រួលរំដោះចរាចរណ៍ និងបង្កើនភាពងាយស្រួលដល់ការធ្វើដំណើររបស់ប្រជាពលរដ្ឋ ចេញចូលរវាងតំបន់មជ្ឈមណ្ឌលអភិវឌ្ឍន៍បឹងកក់ និងមហាវិថីចម្បងៗក្នុងរាជធានីភ្នំពេញ។សូមជម្រាបថា ការសម្រេចបាននូវកិច្ចព្រមព្រៀងនេះ ឆ្លុះបញ្ចាំងពីកិច្ចសហការយ៉ាងជិតស្និទ្ធរវាងរាជរដ្ឋាភិបាល និងភាគីពាក់ព័ន្ធ ក្នុងការដោះស្រាយបញ្ហាប្រឈមនៃលំហូរចរាចរណ៍ ស្របពេលដែលរាជរដ្ឋាភិបាលកំពុងរុញច្រានការអភិវឌ្ឍហេដ្ឋារចនាសម្ព័ន្ធរូបវន្តក្នុងក្រុងឱ្យកាន់តែមានភាពប្រទាក់ក្រឡាគ្នា៕