មន្ត្រីជំនាញរបស់ក្រសួងសាធារណការ និងដឹកជញ្ជូន ចំនួន៥រូប ចូលរួមវគ្គបណ្តុះបណ្តាលស្តីពី ការដឹកជញ្ជូនទំនិញគ្រោះថ្នាក់តាមផ្លូវថ្នល់ (ADR) នៅប្រទេសម៉ាឡេស៊ី ម៉ាឡេស៊ី៖ចាប់ពីថ្ងៃទី១៥ ដល់ថ្ងៃទី១៩ ខែមិថុនា ឆ្នាំ២០២៦ មន្ត្រីជំនាញចំនួន ៥រូប មកពីអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានចូលរួមយ៉ាងសកម្មក្នុងវគ្គបណ្តុះបណ្តាលស្តីពី «ការដឹកជញ្ជូនទំនិញគ្រោះថ្នាក់តាមផ្លូវថ្នល់( ADR) សម្រាប់មន្ត្រីត្រួតពិនិត្យសុវត្ថិភាពដឹកជញ្ជូនទំនិញគ្រោះថ្នាក់កម្ពុជា (Dangerous Goods Transport Safety Supervisor - DGTSS)» ដែលបានប្រព្រឹត្តទៅនៅទីក្រុងកូឡាឡាំពួរ ប្រទេសម៉ាឡេស៊ី។ វគ្គបណ្តុះបណ្តាលដ៏មានសារៈសំខាន់នេះ ទទួលបានការគាំទ្រ និងឧបត្ថម្ភពីគម្រោង CLIP 3 របស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ក្នុងគោលបំណងពង្រឹងសមត្ថភាព និងចំណេះដឹងរបស់មន្ត្រីជំនាញកម្ពុជាឱ្យមានលក្ខណៈសម្បត្តិគ្រប់គ្រាន់ជា «មន្ត្រីត្រួតពិនិត្យសុវត្ថិភាពដឹកជញ្ជូនទំនិញគ្រោះថ្នាក់ (DGTSS)» សំដៅធានាដល់ការរៀបចំលិខិតបទដ្ឋានគតិយុត្តពាក់ព័ន្ធផ្សេងៗលើការដឹកជញ្ជូនទំនិញគ្រោះថ្នាក់តាមផ្លូវថ្នល់នៅក្នុងព្រះរាជាណាចក្រកម្ពុជា ស្របតាមស្តង់ដារសុវត្ថិភាពអន្តរជាតិ។ នៅក្នុងវគ្គបណ្តុះបណ្តាលរយៈពេល ៥ថ្ងៃនេះ មន្ត្រីជំនាញកម្ពុជា បានសិក្សាយ៉ាងស៊ីជម្រៅលើទ្រឹស្តី និងបទប្បញ្ញត្តិបច្ចេកទេសនៃ ADR ព្រមទាំងបានចុះទស្សនកិច្ចសិក្សាផ្ទាល់នៅក្រុមហ៊ុន PETIKEMAS ដែលជាក្រុមហ៊ុនឈានមុខគេមួយ និងទទួលបានការទទួលស្គាល់ជាផ្លូវការពីរាជរដ្ឋាភិបាលម៉ាឡេស៊ី លើការគ្រប់គ្រង ដំណើរការលាងសម្អាត ជួសជុល និងថែទាំស៊ីទែន កញ្ចប់វេចខ្ចប់សម្រាប់ដឹកជញ្ជូនទំនិញគ្រោះថ្នាក់ទាំងក្នុង និងក្រៅប្រទេស៕