ភ្នំពេញ៖ ប្រជាពលរដ្ឋ​ និងអ្នកវិនិយោគ មានក្តីរីករាយដែល​រាជរដ្ឋាភិបាលបានធ្វើការជួសជុលផ្លូវលេខ១៤២ ឡើងវិញបន្ទាប់ពីរងការខូចខាតដោយទឹកជំនន់ កាលពីឆ្នាំកន្លងទៅ ដើម្បីសម្រួលដល់ការធ្វើដំណើរ និងដឹកជញ្ជូនកសិផលរបស់ប្រជាពលរដ្ឋ។ អ្នកវិនិយោគថា នៅពេលផ្លូវនេះដាក់ឱ្យប្រើប្រាស់វានឹង​​ក្លាយជាគោលដៅដ៏ទាក់ទាញ​សម្រាប់​វិនិយោគិនមកបោះទុនវិនិយោគនៅក្នុងតំបន់សេដ្ឋកិច្ចពិសេស​ និងបង្កើតរោងចក្រនៅក្នុងខេត្តកំពង់ស្ពឺ។ ក្រោមតំនិតផ្តួចផ្តើមរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ និងជាតំណាងរាស្ត្រមណ្ឌលខេត្តកំពង់ស្ពឺ បានកៀរគរសប្បុរសជន​ ដោយសហការជាមួយក្រុមហ៊ុន​តំបន់សេដ្ឋកិច្ចពិសេស កំពង់ស្ពឺ ជីង ឆឹង និងក្រុមហ៊ុនថ្ម ខ្សាច់ បានធ្វើការជួសជុលផ្លូវលេខ១៤២ ឡើងវិញ​ដោយចាក់បេតុង​។ សព្វថ្ងៃ ផ្លូវលេខ១៤២ កំពុងដំណើរការសាងសង់ឡើងវិញ​។ ប្រជាពលរដ្ឋ រស់នៅ ឃុំតាំងស្យា ស្រុកភ្នំស្រួច ខេត្តកំពង់ស្ពឺ សប្បាយរីករាយដែល​រាជរដ្ឋាភិបាលធ្វើការជួសជុលផ្លូវលេខ១៤២ ឡើងវិញ ដើម្បីសម្រួលដល់ការធ្វើដំណើរ និងការដឹកជញ្ជូន​កសិផលរបស់ប្រជាពលរដ្ឋ​ទៅកាន់ទីផ្សារ​ ជាពិសេស សម្រួលដល់ការធ្វើដំណើររបស់សិស្សានុសិស្សទៅសាលារៀន។ ចំណែក លោកមេឃុំតាំងស្យា បាន​ឱ្យដឹងថា នៅពេលផ្លូវនេះជួសជុលរួចរាល់ និងដាក់ឱ្យប្រើប្រាស់នឹងផ្តល់ប្រយោ​ជន៍​​ផ្ទាល់ដ​ល់​ប្រជាពលរដ្ឋឃុំនេះប្រមាណ ១១, ៨៧៨នាក់ អាស្រ័យផលពីផ្លូវនេះ​ ដែលពួកគេភាគច្រើនជាប្រជាកសិករ​។ ដោយឡែក លោកស្រី លាវ សៀវលីង អ្នកគ្រប់គ្រងទូទៅតំបន់សេដ្ឋកិច្ចពិសេស ជីង ឆឹង រំលឹងថា កាលពីផ្លូវលេខ១៤២នេះ មិនទាន់ធ្វើការជួសជុលគឺបានក្លាយជាឧបសគ្គមួយធំសម្រាប់​ក្រុមហ៊ុន​ក្នុងការកៀរគរវិនិយោគិនមកបោះទុនវិនិយោគនៅក្នុងតំបន់សេដ្ឋកិច្ចពិសេស ជីង ឆឹង។ ទោះបីយ៉ាងណា ក្រោយពីខិតខំស្វែងរកដំណោះស្រាយអស់រយៈពេលជាង២ឆ្នាំ ជាលទ្ធផលនៅដើមឆ្នាំ ២០២៦ ឯកឧត្តមឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ​ និងជាតំណាងរាស្ត្រមណ្ឌលខេត្តកំពង់ស្ពឺ បានចាត់តាំងក្រុមការងារមកទស្សនកិច្ចផ្ទាល់នៅការដ្ឋានសាងសង់ ដើម្បីពន្លឿនការជួសជុលផ្លូវនេះឱ្យបានឆាប់រហ័សតាមផែនការកំណត់។ លោកស្រីតំណាងឱ្យក្រុមហ៊ុន និងអ្នកវិនិយោគនៅតំបន់សេដ្ឋកិច្ចពិសេស ជីង ឆឹង សូមថ្លែងអំណរគុណចំពោះឯកឧត្តម ហ៊ុន ម៉ានី ឧបនាយករដ្ឋមន្ត្រី និង​រដ្ឋបាលខេត្តកំពង់ស្ពឺ ដែលបានយកចិត្តទុកដាក់ក្នុងការ​ស្តារផ្លូវនេះឡើងវិញទាន់ពេលវេលា។​ សូមបញ្ជាក់ថា កំណាត់ផ្លូវលេខ១៤២ មានប្រវែង ១២.៣៩០ម៉ែត្រ គិតចាប់ពីផ្លូវជាតិលេខ៤ ដល់ភូមិក្រាំងធំ ដែលត្រូវបានជួសជុលស្ថាបនាជាផ្លូវបេតុង កម្រាស់ ០.២៣ម៉ែត្រ និងប្រវែង ៣.២៣២ម៉ែត្រ និងចិញ្ចើមសងខាងផ្លូវ ប្រវែង ១ម៉ែត្រ។ ទាំងប្រជាពលរដ្ឋ និងអ្នកវិនិយោគ បាន​អំពាវនាវដល់អាជ្ញាធរមានសមត្ថកិច្ចពាក់ព័ន្ធត្រូវ​ធ្វើការរឹតបណ្តឹងទប់ស្កាត់លើរថយន្តដឹកលើសទម្ងន់បើកបរលើកំណាត់ផ្លូវលេខ១៤២ ឱ្យបានតឹងរឹង​នៅពេលស្ថាបនារួច​ ដើម្បីធានាដល់ប្រើប្រាស់ បានយូរអង្វែង៕