ដើម្បីលើកកម្ពស់សោភ័ណភាព និងធានាបាននូវសុវត្ថិភាពខ្ពស់ក្នុងការធ្វើដំណើរជូនប្រជា ពលរដ្ឋ នាពេលថ្មីៗនេះ លោក សាយ វណ្ណះ អភិបាលនៃគណៈអភិបាលស្រុកបាទី បានដឹកនាំក្រុមការងារបច្ចេកទេស និងអាជ្ញាធរពាក់ព័ន្ធ ចុះរៀបចំដំឡើងបង្គោលភ្លើងបំភ្លឺផ្លូវ ដើរដោយថាមពលព្រះអាទិត្យ (សូឡា) នៅតាមបណ្តោយផ្លូវជាតិលេខ២ ចាប់ពីព្រំប្រទល់ជាមួយស្រុកសំរោង ស្ថិតក្នុងភូមិសាស្ត្រស្រុកបាទី ខេត្តតាកែវ ។ សកម្មភាពនៃការរៀបចំបំពាក់ភ្លើងសូឡានេះ គឺជាការឆ្លើយតបយ៉ាងទាន់ពេលវេលាទៅនឹងតម្រូវការជាក់ស្តែងរបស់បងប្អូនប្រជាពលរដ្ឋ ក៏ដូចជាអ្នកធ្វើដំណើរឆ្លងកាត់តំបន់នោះ ជាពិសេសនៅពេលរាត្រី ។ គំនិតផ្តួចផ្តើមនេះ មិនត្រឹមតែជួយកាត់បន្ថយគ្រោះថ្នាក់ចរាចរណ៍ និងពង្រឹងសន្តិសុខសណ្តាប់ធ្នាប់សាធារណៈនៅក្នុងមូលដ្ឋានប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ក្នុងការប្រើប្រាស់ថាមពលបៃតង ដែលប្រកបដោយនិរន្តរភាព និងមិនប៉ះពាល់ដល់បរិស្ថាន។ លោក សាយ វណ្ណះ អភិបាលស្រុកបាទី បានមានប្រសាសន៍ថា គម្រោងហេដ្ឋារចនាសម្ព័ន្ធដំឡើងភ្លើងបំភ្លឺផ្លូវនេះ ធ្វើឡើងក្រោមការយកចិត្តទុកដាក់ខ្ពស់ពីថ្នាក់ដឹកនាំខេត្ត ក៏ដូចជារដ្ឋបាលស្រុក ក្នុងការបំរើផលប្រយោជន៍ និងបង្កលក្ខណៈងាយស្រួលទ្វេដងដល់ការរស់នៅ និងការប្រកបរបរទទួលទានរបស់ប្រជាពលរដ្ឋ។ ជាមួយគ្នានេះ លោកអភិបាល ស្រុក ក៏បានអំពាវនាវដល់បងប្អូនប្រជាពលរដ្ឋទាំងអស់ មេត្តាជួយថែរក្សាការពារសមិទ្ធផលទាំងនេះឱ្យបានគង់វង្ស ដើម្បីជាប្រយោជន៍រួមក្នុងសហគមន៍បានយូរអង្វែង ។ បច្ចុប្បន្ន ក្រុមការងាររបស់ស្រុក កំពុងជំរុញការដំឡើងយ៉ាងសកម្ម ដើម្បីឱ្យបង្គោលភ្លើងសូឡាទាំងនោះ អាចបំភ្លឺពេញផ្ទៃផ្លូវជាតិលេខ២ ក្នុងស្រុកបាទី ក្នុងពេលឆាប់ៗខាងមុខនេះ ដែលនឹងធ្វើឱ្យមុខមាត់របស់ស្រុកកាន់តែមានភាពស្រស់បំព្រង និងមានការអភិវឌ្ឍបន្ថែមទៀតមួយកម្រិតទៀត៕