ក្រសួងប្រៃសណីយ៍ និងទូរគមនាគមន៍ ដាក់ឱ្យប្រើប្រាស់ជាផ្លូវការបណ្ណបើកបរឌីជីថល ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការរដ្ឋាភិបាលឌីជីថល (គ.រ.ខ.) នៅរសៀលថ្ងៃពុធ ទី១៣ ខែឧសភា ឆ្នាំ២០២៦ រួមជាមួយ ចូលរួមពិធីប្រកាសដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ឯកសារ verify.gov.kh។ ពិធីនេះមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងទាំងពីរ ឯកឧត្តម លោកជំទាវ ជាសមាជិក សមាជិកា គណៈកម្មាធិការរដ្ឋាភិបាលឌីជីថល ឯកឧត្តម លោកជំទាវ លោក លោកស្រី ភ្ញៀវកិត្តិយស បណ្តាញអ្នកសារព័ត៌មាន និងមន្រ្តីជំនាញពាក់ព័ន្ធជាច្រើនរូប។ ការដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវលើថ្នាលផ្ទៀងផ្ទាត់ឯកសារ verify.gov.kh នាពេលនេះ សាធារណជន អាចស្នើសុំបណ្ណបើកបរឌីជីថល ដាក់ក្នុង Personal Wallet លើ DG SuperApp របស់ក្រសួងប្រៃសណីយ៍ និងទូរគមនាគមន៍ និងអាចប្រើប្រាស់រហូតដល់បណ្ណផុតសុពលភាព៕ ចំពោះរបៀបស្នើសុំ និងប្រើប្រាស់បណ្ណបើកបរឌីជីថលអ្នកអាចទទួលបាន និងប្រើប្រាស់បណ្ណបើកបរឌីជីថលរបស់អ្នកតាមជំហានងាយៗដូចខាងក្រោម៖ ទាញយកកម្មវិធី៖ ដំឡើងកម្មវិធី DG SuperApp (iOS) ឬ DG SuperApp (Google Play) (Android) នៅលើទូរស័ព្ទរបស់អ្នក។ • ចូលទៅកាន់ Personal Wallet៖ ចូលក្នុងកម្មវិធី ហើយស្វែងរកផ្នែក Personal Wallet។ • ស្កែន QR Code៖ ធ្វើការស្កែន QR Code ដែលមាននៅលើបណ្ណបើកបររឹងរបស់អ្នក (ដែលចេញដោយក្រសួងសាធារណការ និងដឹកជញ្ជូន) ដើម្បីរក្សាទុកក្នុងទូរស័ព្ទ។