ពិធីប្រកាសដាក់ឱ្យប្រើប្រាស់ជាផ្លូវការបណ្ណបើកបរឌីជីថល ដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ឯកសារ verify.gov.kh ទីស្តីការក្រសួងប្រៃសណីយ៍ និងទូរគមនាគមន៍៖ រសៀលថ្ងៃពុធ ទី១៣ ខែឧសភា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និង ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការរដ្ឋាភិបាលឌីជីថល (គ.រ.ខ.) អញ្ជើញជាសហអធិបតីក្នុងពិធីប្រកាសដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ឯកសារ verify.gov.kh។ ពិធីនេះមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងទាំងពីរ ឯកឧត្តម លោកជំទាវ ជាសមាជិក សមាជិកា គណៈកម្មាធិការរដ្ឋាភិបាលឌីជីថល ឯកឧត្តម លោកជំទាវ លោក លោកស្រី ភ្ញៀវកិត្តិយស បណ្តាញអ្នកសារព័ត៌មាន និងមន្រ្តីជំនាញពាក់ព័ន្ធជាច្រើនរូប។ ការដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវលើថ្នាលផ្ទៀងផ្ទាត់ឯកសារ verify.gov.kh នាពេលនេះ សាធារណជន អាចស្នើសុំបណ្ណបើកបរឌីជីថល ដាក់ក្នុង Personal Wallet លើ DG SuperApp របស់ក្រសួងប្រៃសណីយ៍ និងទូរគមនាគមន៍ និងអាចប្រើប្រាស់រហូតដល់បណ្ណផុតសុពលភាព។ ការដាក់ឱ្យប្រើប្រាស់ជាផ្លូវការបណ្ណបើកបរឌីជីថលដែលអាចផ្ទៀងផ្ទាត់ភាពត្រឹមត្រូវលើថ្នាលផ្ទៀងផ្ទាត់ឯកសារ verify.gov.kh គឺជាជំហានដ៏សំខាន់មួយក្នុងការចូលរួមអនុវត្តគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ សំដៅជំរុញការធ្វើបរិវត្តកម្មរដ្ឋាភិបាលឌីជីថល និងការផ្តល់សេវាសាធារណៈជូនប្រជាពលរដ្ឋឱ្យកាន់តែមានភាពល្អប្រសើរ និងប្រសិទ្ធភាពខ្ពស់។ ថ្នាលផ្ទៀងផ្ទាត់ឯកសារ verify.gov.kh នេះនឹងចូលរួមចំណែក ក្នុងការលុបបំបាត់ឯកសារក្លែងក្លាយតាមរយៈបច្ចេកវិទ្យាស្កែន QR Code ស្តង់ដារដែលមាន សុវត្ថិភាពខ្ពស់។ ស្ថាប័នពាក់ព័ន្ធ និងសាធារណជន អាចផ្ទៀងផ្ទាត់ភាពត្រឹមត្រូវនៃឯកសារបាន ភ្លាមៗ ដែលជាកត្តានាំឱ្យកាត់បន្ថយចំណាយ និងចំណេញពេលវេលា ពីព្រោះប្រជាពលរដ្ឋមិន ចាំបាច់យកឯកសារទៅធ្វើនីត្យានុកូលកម្ម ជាក្រដាសច្រើនច្បាប់ឡើយ៕