យានយន្តដឹកលើសទម្ងន់៣គ្រឿង នៅស្រុកខ្សាច់កណ្តាល ត្រូវក្រុមការងារចល័តចម្រុះក្រសួង ចុះត្រួតពិនិត្យ និងផាកពិន័យយ៉ាងតឹងរ៉ឹង (កណ្តាល)៖ យានយន្តដឹកជញ្ជូនធុនធ្ងន់ចំនួន៣គ្រឿង ដែលដឹកលើសទម្ងន់កម្រិតអនុញ្ញាត ត្រូវបានក្រុមការងារចល័តចម្រុះរបស់ក្រសួងសាធារណការ និងដឹកជញ្ជូន សហការជាមួយមន្រ្តីស្ថានីយជញ្ជីងព្រែកស្តី ចុះត្រួតពិនិត្យ និងអនុវត្តការផាកពិន័យ នៅថ្ងៃទី១២ ខែឧសភា ឆ្នាំ២០២៦ ស្ថិតនៅឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។ ប្រតិបត្តិការនេះ ធ្វើឡើងក្រោមការចង្អុលបង្ហាញពី ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ព្រមទាំងមានការដឹកនាំផ្ទាល់ពី ឯកឧត្តម គឹម សាន់ និង ឯកឧត្តម មុី ម៉ារ៉ាឌី រួមជាមួយសមាជិកក្រុមការងារចល័តចម្រុះ។ តាមការត្រួតពិនិត្យ បានរកឃើញថា យានយន្តទាំង៣គ្រឿងនេះ ដឹកលើសទម្ងន់អនុញ្ញាតចន្លោះពី៦តោន ដល់១៤តោន ដែលជាកត្តាបង្កហានិភ័យដល់សុវត្ថិភាពចរាចរណ៍ និងធ្វើឱ្យផ្លូវថ្នល់ឆាប់ខូចខាត។ ក្រសួងសាធារណការ និងដឹកជញ្ជូន បានអំពាវនាវដល់ម្ចាស់ក្រុមហ៊ុនដឹកជញ្ជូន ម្ចាស់យានយន្តធុនធ្ងន់ និងអ្នកបើកបរទាំងអស់ ត្រូវចូលរួមគោរពច្បាប់ និងអនុវត្តតាមតម្រាយផ្លូវអនុញ្ញាតសម្រាប់យានយន្តចាប់ពីភ្លៅ៦ឡើងទៅ ឱ្យបានត្រឹមត្រូវ ដើម្បីរួមចំណែកថែរក្សាហេដ្ឋារចនាសម្ព័ន្ធផ្លូវថ្នល់ និងធានាសុវត្ថិភាពសាធារណៈ។ ជាមួយគ្នានេះ ក្រុមការងារចល័តចម្រុះ នឹងបន្តចុះឆ្មក់ត្រួតពិនិត្យយានយន្តដឹកជញ្ជូនលើសទម្ងន់នៅទូទាំងប្រទេស និងអនុវត្តវិធានការផ្លូវច្បាប់យ៉ាងតឹងរ៉ឹង ដោយគ្មានការលើកលែងឡើយ៕