ស្ពានមិត្តភាព កម្ពុជា-ចិន ក្នុងខេត្តក្រចេះ បានក្លាយជា​សរសៃឈាមដ៏សំខាន់សម្រាប់វិស័យដឹកជញ្ជូន ការធ្វើដំណើរឆ្លងកាត់ទន្លេមេគ្គងទៅមកតភ្ជាប់ពីភូមិតាលុស ឃុំបុសលាវ ស្រុកចិត្របុរី (ត្រើយខាងកើត) ទៅកាន់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ (ត្រើយខាងលិច) ក្នុងខេត្តក្រចេះ កាន់តែមានភាពងាយស្រួយនឹងលឿនរហ័សជាងមុន។ លោក សុខ ដា ប្រជាពលរដ្ឋដែលរស់នៅក្នុងខេត្តក្រចេះបានបង្ហាញនូវអារម្មណ៍សប្បាយរីករាយដែលរាជរដ្ឋាភិបាលកម្ពុជា បានជម្រុញនិងបង្កើត​ឲ្យ​មាននូវសមិទ្ធផលស្ពានដ៏ថ្មីសន្លាង ដើម្បីផ្ដល់នូវភាពងាយស្រួលសម្រាប់វិស័យដឹកជញ្ជូន ការធ្វើដំណើរឆ្លងកាត់ទន្លេមេគ្គ ដោយកាលពីពេលកន្លងមក រាល់ពេលពលរដ្ឋ​ចង់ធ្វើដំណើរឆ្លងកាត់ទន្លេមេគ្គងគឺត្រូវធ្វើដំណើរតាមរយៈកំពង់ចម្លងជាចាំបាច់ និងត្រូវចំណាយពេលយូរ ប៉ុន្តែនៅពេលមានស្ពានឆ្លងទន្លេមេគ្គងបែបនេះ បានជួយពន្លឿនដល់ការធ្វើដំណើរទៅមកយ៉ាងរលូននិងមានភាពងាយស្រួលជាខ្លាំង។ លោក សា ពិសិដ្ឋ ជាអ្នកធ្វើដំណើរឆ្លងកាត់បានផ្ដល់នូវបទសម្ភាសន៍ថា ស្ពានមិត្តភាព កម្ពុជា-ចិនគឺជាសរសៃ ឈាម​សេដ្ឋកិច្ច ជាកត្តាចម្បងក្នុងការកាត់បន្ថយការចំណាយរបស់ប្រជាពលរដ្ឋ និងជួយសម្រួលឲ្យកាន់តែមានភាពងាយស្រួល លឿនរហ័ស ក្នុងការធ្វើដំណើរទៅមក នឹងថែមទាំងអាចជួយកាត់បន្ថយនូវហានិភ័យនិងទុក្ខធុរៈរបស់ប្រជាពលរដ្ឋក្នុងខេត្តក្រចេះទាំងមូលផងដែរ។ ស្ពានមិត្តភាព កម្ពុជា-ចិន ឆ្លងកាត់ទន្លេមេគ្គង មានប្រវែងប្រមាណ ១ ៧៦១ ម៉ែត្រ បានបើកការដ្ឋានសាងសង់នៅថ្ងៃទី២ ខែមករា ឆ្នាំ២០២៣ និងបានបើកអោយដំណើរការឆ្លងកាត់ជាបណ្តោះអាសន្ន លើកទី១ កាលពីកំឡុងពិធីបុណ្យកាន់បិណ្ឌភ្ជុំបិណ្ឌ លើកទី២ សម័យប្រឡងសញ្ញាបត្រ័មធ្យមសិក្សាទុតិយភូមិឆ្នាំ២០២៥ និងលើកទី៣ ព្រឹត្តិការណ៍បុណ្យទន្លេលើកទី១០ ទើបកន្លងទៅថ្មីៗនេះ៕