៦ខែដើមឆ្នាំ២០២៦! ក្រសួងសាធារណការ ត្រួតពិនិត្យរថយន្តជាង ១,១លានគ្រឿង រកឃើញដឹកលើសទម្ងន់ជាង ៣២ម៉ឺនគ្រឿង ពិន័យ ៨៥៧គ្រឿង ភ្នំពេញ៖ ក្នុងរយៈពេល ៦ខែដើមឆ្នាំ២០២៦ ក្រសួងសាធារណការ និងដឹកជញ្ជូន បានបន្តរឹតបន្តឹងការត្រួតពិនិត្យ និងបង្ក្រាបរថយន្តដឹកលើសទម្ងន់ តាមរយៈស្ថានីយជញ្ជីង និងក្រុមការងារចល័តនៅទូទាំងប្រទេស។ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី១៣ ខែកក្កដា ឆ្នាំ២០២៦ថា ក្រសួងបានត្រួតពិនិត្យរថយន្តសរុប ១,១៤៤,៦២៣គ្រឿង។ ក្នុងនោះ រថយន្តផ្ទុកមិនលើសទម្ងន់មាន ៨២២,៨៦២គ្រឿង ខណៈរថយន្តផ្ទុកលើសទម្ងន់មាន ៣២១,៧៦១គ្រឿង ស្មើនឹង ២៨.១១% នៃរថយន្តដែលបានត្រួតពិនិត្យ។ ឯកឧត្តមបានបញ្ជាក់ថា រថយន្តផ្ទុកលើសទម្ងន់ទាំងនោះ រួមមាន៖ • ផ្ទុកលើសទម្ងន់ក្រោម ៥%៖ ៣២០,៩០៤គ្រឿង (២៨.០៤%) • ផ្ទុកលើសពី ៥% ដល់ ១០%៖ ១៩៣គ្រឿង (០.០២%) • ផ្ទុកលើសពី ១០% ដល់ ២០%៖ ២៣១គ្រឿង (០.០២%) • ផ្ទុកលើសពី ២០%៖ ៤៣៣គ្រឿង (០.០៤%) ជាមួយគ្នានេះ ក្រសួងបានអនុវត្តការពិន័យលើរថយន្តដែលល្មើសច្បាប់សរុប ៨៥៧គ្រឿង ដើម្បីពង្រឹងការអនុវត្តច្បាប់ និងទប់ស្កាត់ការបំផ្លាញហេដ្ឋារចនាសម្ព័ន្ធផ្លូវថ្នល់ ដែលបណ្តាលមកពីការដឹកជញ្ជូនលើសទម្ងន់។ ក្រសួងសាធារណការ និងដឹកជញ្ជូន បន្តអំពាវនាវដល់ម្ចាស់យានយន្ត និងអាជីវករដឹកជញ្ជូនទាំងអស់ ឱ្យគោរពបទប្បញ្ញត្តិស្តីពីការកំណត់ទម្ងន់ផ្ទុក ដើម្បីរួមចំណែកថែរក្សាផ្លូវថ្នល់ និងធានាសុវត្ថិភាពចរាចរណ៍៕