កិច្ចប្រជុំលើកទី២ របស់ក្រុមលេខាធិការដ្ឋាននៃគណៈកម្មាធិការគ្រប់គ្រងប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈនៃក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃសុក្រ ទី២៧ ខែមីនា ឆ្នាំ២០២៦ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ និងជាប្រធានលេខាធិការដ្ឋាន អញ្ជើញដឹកនាំកិច្ចប្រជុំរបស់ក្រុមការងារ ដោយមានការចូលរួមពី ឯកឧត្តម លោក លោកស្រីជាអនុប្រធាន និងសមាជិកក្រុមការងារ ដើម្បីពិនិត្យនិងពិភាក្សាលើការរៀបចំសំណើគម្រោងចំនួន២ របស់ក្រសួង តាមនីតិវិធីរបស់ក្រសួងមុខងារសាធារណៈ។ ថ្លែងនៅក្នុងកិច្ចប្រជុំនេះ ឯកឧត្តមប្រធានអង្គប្រជុំ បានថ្លែងនូវការកោតសរសើរដល់ក្រុមការងារនៃអគ្គនាយកដ្ឋានផែនការ និងគោលនយោបាយ ដែលបានខិតខំរៀបចំបញ្ចប់សំណើគម្រោងរបស់ក្រសួង ដើម្បីដាក់ឆ្លងការសម្រេចពីថ្នាក់ដឹកនាំ មុននឹងស្នើសុំបន្តតាមនីតិវិធីទៅក្រសួងមុខងារសាធារណៈ។ តាមរយៈសំណើគម្រោងដែលក្រុមការងារបានរៀបចំនេះ មានចំនួន២ រួមមាន ទី១.ការរៀបចំ និងកសាងគោលការណ៍ណែនាំ ស្តីពីគុណភាពសេវាសាធារណៈក្នុងវិស័យសាធារណការ និងដឹកជញ្ជូន និង ទី២.ការៀបចំយន្តការប្រមូលចងក្រងស្ថិតិវិស័យសាធារណការ និងដឹកជញ្ជូន ដែលគ្រោងអនុវត្តនៅក្នុងការិយបរិច្ឆេទឆ្នាំ២០២៦ គឺចាប់ពីថ្ងៃទី១ ខែមេសា ឆ្នាំ២០២៦ ដល់ថ្ងៃទី៣១ ខែធ្នូ ឆ្នាំ២០២៦។ ឯកឧត្តមប្រធានអង្គប្រជុំ បានផ្តាំផ្ញើដល់ក្រុមការងារពាក់ព័ន្ធទាំងអស់ សូមបន្តប្តេជ្ញាចិត្តខ្ពស់ក្នុងការអនុវត្តគម្រោងដែលបានដាក់ស្នើនេះឱ្យសម្រេចជោគជ័យតាមផែនការគ្រោងទុកប្រកបដោយប្រសិទ្ធភាព៕