កិច្ចប្រជុំពិគ្រោះយោបល់លើកទី២ ស្ដីពីនីតិវិធីចងក្រងសៀវភៅមគ្គុទ្ទេសក៍ណែនាំស្ដីពីបរិយាបន្នពិការភាពនៅក្នុងសេវាដឹកជញ្ជូនសាធារណៈតាមផ្លូវគោក និងផ្លូវដែក ទីស្ដីការក្រសួង៖ នាថ្ងៃពុធ ទី១៨ ខែមីនា ឆ្នាំ២០២៦ ឯកឧត្ដម មាស ម៉ូនីកា អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារសកម្មភាពជនពិការ បានអញ្ជើញដឹកនាំកិច្ចប្រជុំពិគ្រោះយោបល់លើកទី២ ស្ដីពីនីតិវិធីចងក្រងសៀវភៅមគ្គុទ្ទេសក៍ណែនាំស្ដីពីបរិយាបន្នពិការភាពនៅក្នុងសេវាដឹកជញ្ជូនសាធារណៈតាមផ្លូវគោក និងផ្លូវដែក ដោយមានការអញ្ជើញចូលរួមពីថ្នាក់ដឹកនាំនៃអគ្គនាយកដ្ឋាន និងនាយកដ្ឋានជំនាញ លោកស្រី Meloney Lindberg តំណាងអង្គការមូលនិធិអាស៊ី តំណាងអង្គការជនពិការកម្ពុជា មន្ត្រីជំនាញ និងមន្ត្រីស្ម័គ្រចិត្ត សរុបចំនួន ២៦រូប។ ឯកឧត្ដមអនុរដ្ឋលេខាធិការបានផ្តល់អនុសាសន៍ណែនាំបន្ថែមដល់ថ្នាក់ដឹកនាំនៃអគ្គនាយកដ្ឋាន នាយកដ្ឋាន លេខាធិការដ្ឋាននៃក្រុមការងារមនុស្សចាស់-ជនពិការ និងមន្ត្រីជំនាញពាក់ព័ន្ធ ត្រូវធ្វើកិច្ចសហការ និងសម្របសម្រួលក្នុងការចងក្រងសៀវភៅមគ្គុទ្ទេសក៍ណែនាំស្ដីពីបរិយាបន្នពិការភាពនៅក្នុងសេវាដឹកជញ្ជូនសាធារណៈតាមផ្លូវគោក និងផ្លូវដែក ឱ្យមានលក្ខណៈគ្រប់ជ្រុងជ្រោយ ស្របតាមបទដ្ឋានគតិយុត្តរបស់ក្រសួងសាធារណការ និងដឹកជញ្ជូន និងស្របទៅតាមការណែនាំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីទុកជាប្រយោជន៍សម្រាប់ការអនុវត្តគម្រោងរៀបចំប្រព័ន្ធដឹកជញ្ជូនសាធារណៈតាមផ្លូវគោក និងផ្លូវដែក។ សូមបញ្ជាក់ថា សៀវភៅមគ្គុទ្ទេសក៏ណែនាំនេះ មិនត្រឹមតែបង្កលក្ខណៈងាយស្រួលក្នុងការរៀបចំបំពាក់បរិក្ខារ និងស្លាកសញ្ញាប្រើប្រាស់សម្រាប់ជនពិការ មនុស្សចាស់ ស្ត្រីមានផ្ទៃពោះ និងកុមារ ប៉ុន្តែក៏ជាមូលដ្ឋានបច្ចេកទេសឌីស្សាញឱ្យមានបរិយាបន្ននៅក្នុងយានយន្តដឹកជញ្ជូនសាធារណៈ នៅទីធ្លាចំណតរង់ចាំសម្រាប់អ្នកដំណើរ និងនៅតាមទីធ្លាលំហសាធារណៈ ស្របតាមការណែនាំដូចមានចែងនៅច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ និងតាមការណែនាំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីជំរុញការអនុវត្តផែនការយុទ្ធសាស្រ្ត ស្តីពីពិការភាពឆ្នាំ២០២៤-២០២៨៕