កិច្ចប្រជុំបូកសរុបលទ្ធផលការងារជំហានទី១ និងពិភាក្សាផែនការអនុវត្តគម្រោងបន្តជំហានទី២ ជាមួយក្រុមការងារភាគីសាធារណរដ្ឋកូរ៉េ ទីស្តីការក្រសួង៖ នាថ្ងៃពុធ ទី១១ ខែមីនា ឆ្នាំ២០២៦ ឯកឧត្តម ប្រាងហង្ស សេរីរិទ្ធ នាយកវិទ្យាស្ថានតេជោសែនសាធារណការ និងដឹកជញ្ជូន បានអញ្ជើញជាអធិបតីក្នុងកិច្ចប្រជុំទទួលជួបពិភាក្សាការងារ និងបូកសរុបលទ្ធផលការងារដែលសម្រេចបានក្នុងជំហានទី១ ព្រមទាំងពិភាក្សាលើការរៀបចំផែនការសម្រាប់ការអនុវត្តគម្រោងបន្តក្នុងជំហានទី២ ជាមួយក្រុមការងារមកពី វិទ្យាស្ថានវិស្វកម្មសំណង់ និងបច្ចេកវិទ្យាអគារកូរ៉េ (KICT) ក្រុមការងារបច្ចេកទេសរបស់ក្រុមហ៊ុន UNDICORNS និងក្រុមការងារបច្ចេកទេសរបស់ក្រុមហ៊ុន DAUM Engineering ។ កិច្ចប្រជុំនេះក៏មានការចូលរួមពី លោកនាយករងវិទ្យាស្ថាន លោក-លោកស្រី ប្រធាននាយកដ្ឋាន និងមន្ត្រីបច្ចេកទេសពាក់ព័ន្ធផងដែរ។ កិច្ចប្រជុំនេះបានផ្តោតលើការអនុវត្តគម្រោង “ធ្វើឱ្យមានភាពប្រសើរឡើងនៃប្រព័ន្ធសាងសង់ និងគ្រប់គ្រងផ្លូវថ្នល់នៅកម្ពុជា ដំណាក់កាលទី២ (២០២៥–២០២៨)” (Extension Project of Road Construction and Management System in Cambodia) ដែលជាគម្រោងជំនួយហិរញ្ញប្បទានឥតសំណងរបស់រដ្ឋាភិបាលសាធារណរដ្ឋកូរ៉េ។ សូមជម្រាបថា ដំណើរទស្សនកិច្ចរបស់ក្រុមការងារភាគីកូរ៉េមកកាន់វិទ្យាស្ថាន ចាប់ពីថ្ងៃទី៩ ដល់ថ្ងៃទី១៤ ខែមីនា ឆ្នាំ២០២៦ នឹងផ្តោតលើការពិភាក្សា និងអនុវត្តការងារបច្ចេកទេសសំខាន់ៗមួយចំនួន រួមមាន៖ ១).ការរៀបចំកាលវិភាគសម្រាប់ការអនុវត្តការងារលម្អិត ២).ការពិនិត្យវឌ្ឍនភាពការងារលើកម្មវិធីវាយតម្លៃគុណភាពកម្រាលផ្លូវ (PMS/PQMS) និងប្រព័ន្ធគ្រប់គ្រងស្ពាន (sm-PED) ៣).ការបូកសរុបលទ្ធផលការងារជំហានទី១ និងការចាប់ផ្តើមអនុវត្តការងារជំហានទី២ ៤).ការបណ្ដុះបណ្ដាលជាក់ស្តែងលើផ្នែកវិស្វកម្មកម្រាលផ្លូវ និង ៥).ការផ្ទៀងផ្ទាត់ទិន្នន័យវាស់ស្ទង់ស្ថានភាពកម្រាលផ្លូវ៕