ឯកឧត្តម គួច ប៊ុនលាត រដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញបន្តចុះពិនិត្យវឌ្ឍនភាពការងារ និងបញ្ហាប្រឈម នៃការគ្រប់គ្រង ប្រតិបត្តិការ និងថែទាំប្រព័ន្ធចម្រោះទឹកកខ្វក់ នៅខេត្តបន្ទាយមានជ័យ និងខេត្តសៀមរាប នាថ្ងៃទី២៦ ខែកុម្ភៈ ឆ្នាំ២០២៦ ឯកឧត្តម គួច ប៊ុនលាត រដ្ឋលេខាធិការ ក្រសួងសាធារណការ និងដឹកជញ្ជូន បានបន្តបេសកកម្មដឹកនាំក្រុមការងារបច្ចេកទេស អញ្ជើញចុះពិនិត្យវឌ្ឍនភាពការងារ និងបញ្ហាប្រឈម នៃការគ្រប់គ្រង ប្រតិបត្តិការ និងថែទាំប្រព័ន្ធចម្រោះទឹកកខ្វក់ នៅខេត្តបន្ទាយមានជ័យ និងខេត្តសៀមរាប ស្ថិតក្រោមផែនការគម្រោងការងារសាងសង់ ឆ្នាំ២០២៦។ ដំណើរចុះពិនិត្យនេះ មានការចូលរួមពីថ្នាក់ដឹកនាំ និងមន្ត្រីបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ និងអគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន ព្រមទាំងអាជ្ញាធរមូលដ្ឋាន និងអង្គភាពពាក់ព័ន្ធ ដើម្បីពិនិត្យ និងវាយតម្លៃលើវឌ្ឍនភាពគម្រោង ការអនុវត្តការងារ និងបញ្ហាប្រឈមនានា ដែលពាក់ព័ន្ធនឹងការគ្រប់គ្រង ប្រតិបត្តិការ និងថែទាំប្រព័ន្ធទឹកកខ្វក់។ ការចុះត្រួតពិនិត្យផ្តោតលើទីតាំងសំខាន់ៗ រួមមាន៖ នៅខេត្តបន្ទាយមានជ័យៈ ១). គម្រោងស្ថាបនាលូប្រអប់ ទំហំ ២,០ ម៉ែត្រ x ២,០ ម៉ែត្រ ប្រវែង ៩០០ ម៉ែត្រ ក្រុងប៉ោយប៉ែត ខេត្តបន្ទាយមានជ័យ ២). ពិនិត្យវឌ្ឍនភាពនៃស្ថានីយប្រព្រឹត្តកម្មទឹកកខ្វក់ក្រុងសិរិសោភ័ណ្ឌ ដែលមានសមត្ថភាពចម្រោះ ៣៥០០ម៉ែត្រក្នុង១ថ្ងៃ បច្ចុប្បន្នសម្រេចបាន ៩០% ដែលគ្រោងបញ្ចប់គម្រោងសាងសង់ជាស្ថាពរនៅខែមិថុនា ឆ្នាំ២០២៦ ៣). កិច្ចប្រជុំពិភាក្សាការងារ ស្តីពីវឌ្ឍនភាព និងបញ្ហាប្រឈម នៃការគ្រប់គ្រង ប្រតិបត្តិការ និងថែទាំប្រព័ន្ធទឹកកខ្វក់ រួមមានបណ្តាញលូ និងស្ថានីយប្រព្រឹត្តកម្មទឹកកខ្វក់នៅមន្ទីរសាធារណការ និងដឹកជញ្ជូន ខេត្តបន្ទាយមានជ័យ។ ចំណែកឯនៅខេត្តសៀមរាបៈ ១). គម្រោងស្ថាបនាលូប្រអប់ ទំហំ ១,៥ ម៉ែត្រ x ១,៥ ម៉ែត្រ ប្រវែង ៧៤០ម៉ែត្រ រំដោះទឹកជំនន់ចេញពីទីប្រជុំជនស្រុកក្រឡាញ់ ខេត្តសៀមរាប ២). ពិនិត្យស្ថានភាពនៃការប្រតិបត្តការ និងថែទាំស្ថានីយប្រព្រឹត្តកម្មទឹកកខ្វក់ក្រុងសៀមរាប និងស្ថានីយបូមបញ្ជូនទឹកកខ្វក់វត្តចក និងស្ថានីយបូមបឹងដូនប៉ា និង ៣). កិច្ចប្រជុំពិភាក្សាការងារ ស្តីពីវឌ្ឍនភាព និងបញ្ហាប្រឈម នៃការគ្រប់គ្រង ប្រតិបត្តិការ និងថែទាំប្រព័ន្ធទឹកកខ្វក់ រួមមានបណ្តាញលូ និងស្ថានីយប្រព្រឹត្តកម្មទឹកកខ្វក់នៅស្ថានីយប្រព្រឹត្តកម្មទឹកកខ្វក់ក្រុងសៀមរាប។ ឯកឧត្តមរដ្ឋលេខាធិការ បានណែនាំដល់មន្ទីរខេត្តបន្ទាយមានជ័យ ត្រៀមខ្លួនក្នុងការបណ្តុះបណ្តាលមន្រ្តីសម្រាប់ការប្រតិបត្តិការ និងថែទាំស្ថានីយប្រព្រឹត្តម្មទឹកកខ្វក់ ដែលនឹងបញ្ចប់នាពេលឆាប់នេះ។ ដោយឡែកសម្រាប់ខេត្តសៀមរាប ឯកឧត្តមរដ្ឋលេខាធិការនឹងជំរុញឱ្យអគ្គនាយកដ្ឋានប្រព័ន្ធចម្រោះទឹកកខ្វក់ សិក្សាពិនិត្យស្នើថវិកាគាំទ្រការងារប្រតិបត្តិការ និងថែទាំប្រព័ន្ធទឹកកខ្វក់ដើម្បីឆ្លើយតបទៅនឹងការលើកកម្រិត និងសាងសង់ស្ថានីយបូម២ទីតាំងបន្ថែមទៀត៕