ប្រាក់ចំណូលសរុបរបស់កំពង់ផែស្វយ័តក្រុងព្រះសីហនុ (កសស) ក្នុងត្រីមាសទី៤ ឆ្នាំ២០២៥ មានប្រមាណជាង ៤៧ លានដុល្លារ កើនឡើងជិត ៥០% បើធៀបនឹងរយៈពេលដូចគ្នាក្នុងឆ្នាំ២០២៤ ខណៈប្រាក់ចំណេញសុទ្ធក្នុងការិយបរិច្ឆេទមានជាង ១៩ លានដុល្លារ។ របាយការណ៍ប្រចាំត្រីមាសទី៤ ឆ្នាំ២០២៥ របស់កំពង់ផែស្វយ័តក្រុងព្រះសីហនុ ដែលផ្ញើឱ្យផ្សារមូលបត្រកម្ពុជា (CSX) ឱ្យដឹងថា ក្នុងត្រីមាសទី៤ ឆ្នាំ២០២៥ កំពង់ផែស្វយ័តក្រុងព្រះសីហនុរកចំណូលបានសរុបប្រហែល ៤៧,៤៧ លានដុល្លារ (១៨៩ ៩០០ ២៦៦ ពាន់រៀល) កើនឡើង ៤៩,៨៦% បើធៀបនឹងត្រីមាសទី៤ ឆ្នាំ២០២៤ ដែលមាន ៣១,៦៧ លានដុល្លារ (១២៦ ៧១៦ ៣៧២ ពាន់រៀល)។ កាលពីត្រីមាសទី៤ ឆ្នាំ២០២៣ អង្គភាពនេះរកចំណូលបានប្រមាណ ២៥,០២ លានដុល្លារ (១០០ ០៧២ ៧៨០ ពាន់រៀល)។ប្រភពចំណូលសំខាន់ៗរបស់កំពង់ផែស្វយ័តក្រុងព្រះសីហនុ ក្នុងត្រីមាសទី៤ ឆ្នាំ២០២៥ រួមមាន ចំណូលពីការលើកដាក់ពីនាវាទៅទីលាន, ចំណូលលើកដាក់លើទីលាន, ចំណូលពីសេវាកម្មនាវាចរ, ចំណូលស្តុក ឃ្លាំង និងទីលាន, ចំណូលដឹកជញ្ជូន, ចំណូលនាវាទេសចរណ៍, ចំណូលពីតំបន់សេដ្ឋកិច្ចពិសេស, ចំណូលជួលទីតាំង, និងចំណូលផ្សេងៗទៀត។ទន្ទឹមនឹងប្រាក់ចំណូល កំពង់ផែក៏បានចំណាយលើការបង់ពន្ធផ្សេងៗ ដែលធ្វើឱ្យកំពង់ផែមានប្រាក់ចំណេញសុទ្ធក្នុងការិយបរិច្ឆេទ នាត្រីមាសទី៤ ឆ្នាំ២០២៥ ចំនួន ១៩,៣៣ លានដុល្លារ (៧៧ ៣៣៧ ៦៨៦ ពាន់រៀល) កើនឡើង ២១,៨២% ពីចំនួន ១៥,៨៧ លានដុល្លារ (៦៣ ៤៨៣ ៨៤៣ ពាន់រៀល)។ ប្រធានអគ្គនាយកកំពង់ផែស្វយ័តក្រុងព្រះសីហនុ លោក លូ គឹមឈន់ បាននិយាយថា ក្នុងត្រីមាសទី៤ ឆ្នាំ២០២៥ កសសសម្រេចបានបរិមាណកុងតឺន័រឆ្លងកាត់ចំនួន ៣៨៨ ៤៣៦ TEUs កើនឡើង ១១៦ ៩៨៣ TEUs ស្មើនឹង ៤៣,១០% ធៀបត្រីមាសទី៤ ឆ្នាំ២០២៤។ កម្ពុជាមានមោទនភាពដែលកំពង់ផែដើរតួនាទីជាច្រកទ្វារនាំទំនិញចេញ-ចូលដ៏សំខាន់ និងឯករាជ្យ អាចជួយដោះស្រាយបញ្ហាប្រឈម ជំរុញកំណើនសេដ្ឋកិច្ចជាតិ និងកំពុងអភិវឌ្ឍខ្លួនជាបណ្តើរៗ ស្របតាមចក្ខុវិស័យ និងគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែតំបន់ និងមជ្ឈមណ្ឌលឡូជីស្ទិក ដែលមិនត្រឹមតែសម្រាប់ប្រទេសកម្ពុជាប៉ុណ្ណោះទេ គឺសម្រាប់តំបន់ទន្លេមេគង្គ និងលើសពីនេះទៀត ជាទស្សនវិស័យដ៏ឈ្លាសវៃបំផុតរបស់រាជរដ្ឋាភិបាលកម្ពុជា និងទទួលបានការគាំទ្រពីរដ្ឋាភិបាលជប៉ុនផងដែរ។ លោកបញ្ជាក់ថា៖«កសស ប្តេជ្ញាចូលរួមជាមួយរាជរដ្ឋាភិបាលកម្ពុជាឆ្ពោះទៅសម្រេចបានចក្ខុវិស័យនាឆ្នាំ២០៥០ ក្នុងការប្រែក្លាយជាប្រទេសដែលមានចំណូលខ្ពស់ តាមរយៈការពង្រឹងគុណភាពសេវាកម្ម ការប្រើប្រាស់បរិវត្តកម្មឌីជីថល និងជំរុញការតភ្ជាប់»៕