កិច្ចប្រជុំអង្គភាពគ្រប់គ្រងគម្រោងលើកកម្ពស់ការតភ្ជាប់ហេដ្ឋារចនាសម្ព័ន្ធក្នុងតំបន់ នៅព្រះរាជាណាចក្រកម្ពុជា ក្រោមក្របខ័ណ្ឌហិរញ្ញប្បទានពីធនាគារពិភពលោក ទីស្ដីការក្រសួង៖ នាថ្ងៃសុក្រ ទី២៨ ខែវិច្ឆិកា ឆ្នាំ២០២៥ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំកិច្ចប្រជុំប្រកាសសមាសភាពអង្គភាពគ្រប់គ្រងគម្រោងលើកកម្ពស់ការតភ្ជាប់ហេដ្ឋារចនាសម្ព័ន្ធក្នុងតំបន់ នៅព្រះរាជាណាចក្រកម្ពុជា (Cambodia Regional Connectivity Improvement Project) ក្រោមក្របខ័ណ្ឌហិរញ្ញប្បទានពីធនាគារពិភពលោក ដោយមានការអញ្ជើញចូលរួមពីថ្នាក់ដឹកនាំ និងសមាជិក សមាជិកាគម្រោងជាច្រើនរូប។ បន្ថែមលើនេះ ឯកឧត្តមរដ្ឋលេខាធិការ ក៏បានជម្រាបជូនអង្គប្រជុំអំពីសាវតា និងផែនការសកម្មភាពគម្រោងមួយចំនួនដែលត្រូវអនុវត្ត និងស្នើឱ្យថ្នាក់នាំ រួមជាមួយសមាជិក សមាជិការបស់អង្គភាពគ្រប់គ្រងគម្រោង យកចិត្តទុកដាក់ ខិតខំអនុវត្តភារកិច្ចដែលថ្នាក់ដឹកនាំក្រសួងបានប្រគល់ជូនសំដៅធ្វើយ៉ាងណាឱ្យការអនុវត្តគម្រោងនេះទទួលបានលទ្ធផលល្អ ប្រកបដោយប្រសិទ្ធភាពខ្ពស់៕