កិច្ចប្រជុំពិនិត្យលើសេចក្ដីព្រាងច្បាប់ ស្ដីពីការគ្រប់គ្រង និងការអភិវឌ្ឍវិស័យភស្តុភាកម្មនៅកម្ពុជា ទីស្ដីការក្រសួង៖ នាថ្ងៃអង្គារ ទី២៩ ខែកក្កដា ឆ្នាំ២០២៥ ឯកឧត្ដម ហេង ណន រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្ទៃក្នុងពិនិត្យ ពិភាក្សាបន្ថែមលើសេចក្ដីព្រាងច្បាប់ស្ដីពី ការគ្រប់គ្រង និងការអភិវឌ្ឍវិស័យភស្តុភាកម្ម ដោយមានការអញ្ជើញចូលរួមពីថ្នាក់ដឹកនាំ និងមន្រ្តីជំនាញនៃអគ្គនាយកដ្ឋានភស្តុភារកម្មជាផងដែរ។ កិច្ចប្រជុំនេះ ធ្វើឡើងក្នុងគោលបំណងដើម្បីពិនិត្យ ពិភាក្សាលើអត្ថន័យ ខ្លឹមសារ វិសាលភាព សមត្ថកិច្ចគ្រប់គ្រងអំពីសេវាភស្តុភារកម្ម ឋបនីយ៍ភណ្ឌភស្តុភារកម្មត្រូវចុះបញ្ជី ការកណត់ប្រើប្រាស់ពាក្យ ភស្តុភារកម្ម ឬឡូជីស្ទីក និងមានចំណុចជាច្រើន ដែលបានបញ្ចូលក្នុងសេចក្ដីព្រាងច្បាប់នេះ ធ្វើឱ្យបានគ្រប់ជ្រុងជ្រោយ និងល្អប្រសើរ ដោយធានាបានប្រសិទ្ធភាព ស័ក្តិសិទ្ធិភាព សុវត្ថិភាព ក្នុងវិស័យភស្តុភារកម្មនៅព្រះរាជាណាចក្រកម្ពុជា។ ឯកឧត្ដមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះអង្គប្រជុំ ដែលបានចូលរួមយ៉ាងផុលផុសក្នុងការផ្ដល់នូវមតិយោបល់ល្អៗ និងបានផ្តល់ធាតុចូលសំខាន់ៗជាច្រើនក្នុងការកែសម្រួលសេចក្ដីព្រាងច្បាប់នេះឱ្យកាន់តែមានអត្ថន័យច្បាស់លាស់ និងជួយពន្លឿនដល់ការរៀបចំច្បាប់នេះឱ្យកាន់តែឆាប់រហ័ស ដើម្បីដាក់ជូនថ្នាក់ដឹកនាំក្រសួងនាពេលឆាប់ៗផងដែរ៕