កំពត៖ បញ្ហាគ្រោះថនាក់ចរាចរណ៍ផ្លូវគោក នៅតែជាក្តីព្រួយបារម្ភខ្លាំងរបស់រាជរដ្ឋាភិបាល ដោយបានធ្វើឱ្យអត្រានៃមនុស្សស្លាប់ និងរងរបួស ពីមួយឆ្នាំទៅមួយឆ្នាំមានការកើនឡើងជាលំដាប់ ដោយសារតែអ្នកប្រេីប្រាស់ផ្លូវមិនបានគោរព្ធច្បាប់ចរាចរណ៍។ លោកស្រី វី ស្រីពៅ រដ្ឋលេខាធិការក្រសួងអធិការកិច្ច បានលើកឡេីងក្នុងពិធីផ្សព្វផ្សាយច្បាប់ស្តីពី ចរាចរណ៍ផ្លូវគោក នៅក្រុងកំពត នារសៀលថ្ងៃទី២៤ ខែមេសា ឆ្នាំ២០២៥ ថា បញ្ហាចរាចរណ៍ផ្លូវគោក បានធ្វើឱ្យអត្រានៃមនុស្សស្លាប់ រងរបួសពីមួយឆ្នាំទៅមួយឆ្នាំមានការកើនឡើងជាលំដាប់ ដែលនេះគេមិនទាន់និយាយទៅដល់ការបន្សល់ទុកស្ត្រីមេម៉ាយ កូនកំព្រា ការនិរាសព្រាត់ប្រាស់ក្នុងគ្រួសារ និងជនពិកានៅឡើយ។ ទន្ទឹមនេះលោកស្រីក៏បានធ្វើការអំពាវនាវដល់សាធារណជន និងអ្នកប្រើប្រាស់ផ្លូវទាំងអស់ ខិតខំយកចិត្តទុកដាក់បង្កើនស្មារតីចូលរួមបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដោយបើកបរត្រូវគោរពច្បាប់ ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌ និងការយោគយល់អធ្យាស្រ័យ មិនត្រូវបើកបរលើសល្បឿនកំណត់ ត្រូវពាក់មួកសុវត្ថិភាពជានិច្ចពេលជិះម៉ូតូ។ ម្យ៉ាងទៀតពេលធ្វើដំណើរតាមយានយន្ត ទោះជិតឬឆ្ងាយ ត្រូវពាក់ខ្សែក្រវាត់សុវត្ថិភាពជានិច្ចក្នុងពេលធ្វើដំណើរ និងត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វាំង ភ្លើងបំភ្លឺ ជាពិសេសមិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត។ ជាមួយគ្នានេះ លោក ពេញ ធារម្យ អភិបាលរងខេត្តកំពត ក៏បានលើកទឹកចិត្តឱ្យសិស្សានុសិស្ស និងយុវជន ក្រៅពីការខិតខំសិក្សាឈ្វេងយល់ និងគោរពច្បាប់ចរាចរណ៍ដើម្បីធ្វើជាពលរដ្ឋគំរូនោះ ក៏ត្រូវជួយផ្សព្វផ្សាយច្បាប់នេះបន្តដល់បងប្អូន និងប្រជាពលរដ្ឋនៅតាមមូលដ្ឋានរបស់ខ្លួនឱ្យបានទូលំទូលាយ ព្រោះការគោរពច្បាប់ចរាចរណ៍ពេលធ្វើដំណើរ អាចជួយសង្គ្រោះអាយុវជីវិត និងការពារទ្រព្យសម្បត្តិខ្លួនឯង និងអ្នកដទៃ។ យោងតាមរបាយការណ៍គ្រោះថ្នាក់ចរាចរណ៍ បានឱ្យដឹងថា ក្នុងឆ្នាំ២០២៤ បានកើតឡើងចំនួន ២.៨៤៤លើក, អ្នកស្លាប់ចំនួន ១.៥០៩នាក់(ជាមធ្យមស្លាប់៤នាក់/ថ្ងៃ), របួសធ្ងន់ចំនួន ២.២៧៣នាក់, របួសស្រាល ១.៤៤៧នាក់, និងមិនពាក់មួកសុវត្ថិភាពពេលមានគ្រោះថ្នាក់ចំនួន ២.៤៧៧នាក់។ របាយការណ៍បានបញ្ជាក់ថា ភាគច្រើនបណ្តាលមកពីការបើកបរយានយន្តមិនគោរពច្បាប់ ឬរធ្វេសប្រហែស ដូចជាបើកបរលើសល្បឿនកំណត់ វ៉ាជែងក្នុងស្ថានភាពគ្រោះថ្នាក់ បើកបរក្នុងស្ថានភាពស្រវឹង ខ្វះការប្រុងប្រយ័ត្ន មិនមានការយោគ យល់អធ្យាស្រ័យ និងមិនគោរពសិទ្ធិអាទិភាពជាដើម៕