គណៈប្រតិភូកម្ពុជាបំពេញទស្សនកិច្ចសិក្សាស្វែងយល់អំពីប្រព័ន្ធចរាចរណ៍ឆ្លាតវៃនៅទីក្រុង Hangzhou ខេត្ត Zhejiang នៃសាធារណរដ្ឋប្រជាមានិតចិន ប្រទេសចិន៖ ឯកឧត្តម សេន ស៊ីហ៊ត រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូកម្ពុជា បំពេញទស្សនកិច្ចសិក្សាស្វែងយល់អំពីប្រព័ន្ធចរាចរណ៍ឆ្លាតវៃ នៅទីក្រុង Hangzhou ខេត្ត Zhejiang នៃសាធារណរដ្ឋប្រជាមានិតចិន ចាប់ពីថ្ងៃទី១៨ ដល់ថ្ងៃទី២២ ខែសីហា ឆ្នាំ២០២៥ ដោយមានការចូលរួមអមដំណើរដោយ ថ្នាក់ដឹកនាំក្រសួងសាធារណការ និងដឹកជញ្ជូន តំណាងក្រសួងមហាផ្ទៃ តំណាងគណៈកម្មាធិការជាតិគ្រប់គ្រងគ្រោះមហន្តរាយ និងថា្នក់ដឹកនាំ និងមន្ត្រីនៃអគ្គនាយកដ្ឋានដឹកជញ្ជូនផ្លូវគោក សរុបចំនួន ១២នាក់។ ជាលទ្ធផលនៃដំណើរបំពេញទស្សនកិច្ចសិក្សាស្វែងយល់អំពីប្រព័ន្ធចរាចរណ៍ឆ្លាតវៃនៅទីក្រុង Hangzhou ខេត្ត Zhejiang រយៈពេល ៥ថ្ងៃកន្លងទៅនេះ រួមមានដូចខាងក្រោម៖ ១). សិក្សាអំពីការប្រើប្រាស់នូវប្រព័ន្ធបច្ចេកវិទ្យា ដើម្បីប្រមូល និងវិភាគទិន្នន័យ ២). យល់អំពីឧបករណ៍បច្ចេកទេសទំនើបៗដែលក្រុមហ៊ុនផលិតសម្រាប់បម្រើដល់ការងារគ្រប់គ្រងចរាចរណ៍ សុខាភិបាល កសិកម្ម និងសន្តិសុខ ៣). ទស្សនាមជ្ឈមណ្ឌលបញ្ជាប្រតិបត្តិការតាមដានប្រព័ន្ធគ្រប់គ្រងចរាចរណ៍ទីក្រុង Hangzhou ៤). សិក្សានៅមូលដ្ឋានប៉ូលីសចរាចរណ៍ក្រុង Hangzhou ដើម្បីស្វែងយល់អំពីបទពិសោធន៍ជាក់ស្តែងនៅតាមដងផ្លូវក្នុងខេត្ត Hangzhou នូវការប្រើប្រាស់ប្រព័ន្ធ Green Wave and smart Intersection។ អំឡុងពេលនៃដំណើរបំពេញទស្សនកិច្ច គណៈប្រតិភូបានជួបប្រជុំពិភាក្សាជាមួយតំណាងក្រុមហ៊ុន ក្នុងនោះដែរភាគីក្រុមហ៊ុនក៏បានបង្ហាញអំពីប្រសិទ្ធភាពនៃប្រព័ន្ធ Green Wave ដែលអាចជួយដោះស្រាយបញ្ហាចរាចរណ៍នៅក្នុងទីក្រុង ដូចជា ការកកស្ទះចរាចរណ៍ និងគ្រោះថ្នាក់ចរាចរណ៍ និងគំនិតផ្តួចផ្តើមក្នុងការយកប្រព័ន្ធនេះទៅបំពាក់នៅប្រទេសកម្ពុជា។ ប្រតិភូកម្ពុជាបានសម្តែងនូវការគាំទ្រនូវគំនិតផ្តួចផ្តើមខាងលើ និងបានស្នើសុំភាគីក្រុមហ៊ុនសហការជាមួយស្ថាប័នជំនាញ ធ្វើការសិក្សាឱ្យបានគ្រប់ជ្រុងជ្រោយ ទាំងក្នុងក្របខ័ណ្ឌនយោបាយ និងបច្ចេកទេស ជាពិសេសបទដ្ឋានគតិយុត្ត ហេដ្ឋារចនាសម្ព័ន្ធដែលបម្រើឱ្យវិស័យដឹកជញ្ជូន និងស្ថានភាពប្រជាសាស្ត្រផ្សេងៗ ដើម្បីប្រាកដថាប្រព័ន្ធនេះអាចអនុវត្តបាននៅកម្ពុជាប្រកបប្រសិទ្ធភាពខ្ពស់។ នៅក្នុងដំណើរទស្សនកិច្ចសិក្សា តំណាងក្រុមហ៊ុនក៏បានផ្តល់ឱកាសឱ្យប្រតិភូកម្ពុជាក្នុងការស្វែងយល់អំពីវប្បធម៌ប្រពៃណីរបស់ប្រជាជននៅក្រុង Hangzhou ខេត្ត Zhejiang នៃសាធារណរដ្ឋប្រជាមានិតចិន ផងដែរ៕