អាជ្ញាធរខណ្ឌបឹងកេងកង ស្នើសុំប្រជាពលរដ្ឋជួយយោគយល់លើការយឺតយ៉ាវជួសជុលផ្លូវខូចខាតជាច្រើនកន្លែងដែលធ្វើឲ្យប៉ះពាល់ដល់ការធ្វើដំណើរក្នុងរដូវភ្លៀងធ្លាក់ ដោយសារតែមន្ត្រីជំនាញកំពុងសម្រុកពង្រីកប្រព័ន្ធលូ ១០៥។ ជាក់ស្ដែងចាប់ពីចំណុចផ្លូវលេខ ៩៥ ចាប់ពីចំណុចផ្លូវលេខ ៣៦០ ដល់មហាវិថីម៉ៅសេទុង ស្ថិតក្នុងសង្កាត់បឹងកេងកង ៣ ខណ្ឌបឹងកេងកង រាជធានីភ្នំពេញ។អ្នកស្រី ណាវីន ជាអ្នកធ្វើដំណើរតាមផ្លូវមួយខ្សែនេះ បានឲ្យដឹងថា ចំណុចផ្លូវនេះខូចជាយូរណាស់មកហើយ តែមិនដែលឃើញខាងអាជ្ញាធរមកជួសជុល ឬ ស្ថាបនាទាល់តែសោះ ធ្វើឲ្យពលរដ្ឋជួបការលំបាកជាខ្លាំងពេលធ្វើដំណើរ ពិសេសពេលមានភ្លៀង និងទឹកដក់នៅពេលភ្លៀងធ្លាក់ម្តងៗ គឺទឹកក្នុងជង្ហុក អ្នកដំណើរមើលមិនឃើញ ជិះធ្លាក់ជង្ហុកដួលម្តងៗ ទៅហើយ។ដោយឡែក លោក សុខ សម្បត្តិ អភិបាលខណ្ឌបឹងកេងកង បានប្រាប់កម្ពុជាថ្មីឲ្យដឹងថា លោកបានលើកគម្រោងអភិវឌ្ឍន៍ផ្លូវ ៩៥ នេះ រួចហើយ ប៉ុន្តែមន្ត្រីជំនាញរបស់រដ្ឋបាលរាជធានីភ្នំពេញ កំពុងធ្វើការសម្រុកពង្រីកប្រព័ន្ធលូនៅលើផ្លូវ ១០៥ ជាមុនសិន ដើម្បីឲ្យហើយមុនរដូវវស្សាដែលកៀកខិតជិតមកដល់នាពេលខាងមុខ។ បើសិនជាមានការយឺតយ៉ាវក្នុងការពង្រីកលូ ១០៥ នោះ ប្រាកដជាមានការជន់លិចជាក់ជាពុំខាន។លោកអភិបាលខណ្ឌ បានបញ្ជាក់ថា អាជ្ញាធរសុំការអធ្យាស្រ័យពីសំណាក់ប្រជាពលរដ្ឋរស់នៅលើផ្លូវលេខ ៩៥ សូមមេត្តាយោគយល់ចំពោះបញ្ហានេះ ដែលករណីចំណុចផ្លូវជង្ហុកខូចខាតនេះដែរ ខាងរដ្ឋបាលខណ្ឌបឹងកេងកង នឹងដាក់កម្លាំងចុះទៅជួសជុលជង្ហុកតាមដែលអាចធ្វើទៅបាន។ ចំពោះផ្លូវខូចខាតផ្សេងទៀតនៅក្នុងមូលដ្ឋានខណ្ឌបឹងកេងកង គឺត្រូវបានដាក់បញ្ចូលទៅក្នុងគម្រោងជួសជុលរួចអស់ហើយ៕