ជំនួបសម្ដែងការគួរសម និងជម្រាបលាពីគណៈប្រតិភូទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ប្រចាំកម្ពុជា ទីស្ដីការក្រសួង៖ នាថ្ងៃទី២១ ខែកុម្ភ: ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានទទួលជួបសម្ដែងការគួរសម និងជម្រាបលាពីសំណាក់លោកស្រី Tokumoto Aya ទីប្រឹក្សាបង្កើតគម្រោង របស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ប្រចាំកម្ពុជា ដែលបានបញ្ចប់បេសកកម្មនៅប្រទេសកម្ពុជា ដោយមានអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក ថ្នាក់ដឹកនាំ និងមន្ត្រីនៃអគ្គនាយកដ្ឋានប្រព័ន្ធចម្រោះទឹកកខ្វក់។ ជំនួបនេះធ្វើឡើងក្នុងគោលបំណងដើម្បីជួបសម្ដែងការគួរសម ក៏ដូចជាជម្រាបលា និងណែនាំនូវសមាសភាពថ្មីដែលត្រូវមកបំពេញភារកិច្ចបន្តពីលោកស្រី Tokumoto Aya គឺលោក MUNAKATA Atsushi។ ឆ្លៀតក្នុងឱកាសនេះផងដែរ ឯកឧត្តមរដ្ឋលេខាធិការ បានរំលឹកពីការងារសហការរវាងកម្ពុជា និងជប៉ុន ក៍ដូចជាវត្តមានរបស់JICA ស្របពេលដែលកម្ពុជាបានជួបប្រទះការលំបាកនាពេលកន្លងមក ទាំងអស់នេះឆ្លុះបញ្ចាំងអំពីចំណងមិត្តភាពដ៏យូរអង្វែងរវាងប្រជាជាតិទាំងពីរ ជប៉ុន និងកម្ពុជា។ ក្នុងនាមថ្នាក់ដឹកនាំក្រសួង ឯកឧត្ដមរដ្ឋលេខាធិការក៏បានសម្តែងនូវអំណរគុណដល់ JICA ប្រជាជនជប៉ុន ក៏ដូចជារដ្ឋាភិបាលជប៉ុន ដែលតែងតែយកចិត្តទុកដាក់ក្នុងការផ្តល់នូវជំនួយបច្ចេកទេស និងថវិកា ដើម្បីជួយជំរុញក្នុងការអភិវឌ្ឍហេដ្ឋារចនាសម្ព័ន្ធក្នុងវិស័យសាធារណ និងដឹកជញ្ជូន ក៏ដូចជាវិស័យផ្សេងៗ និងជួយពង្រឹងសមត្ថភាពស្ថាប័នក្នុងការដោះស្រាយនូវបញ្ហាផ្សេងៗដែលកំពុងប្រឈមនាពេលបច្ចុប្បន្ន និងសំណូមពរដល់ JICA ក៏ដូចជារដ្ឋាភិបាលជប៉ុន នៅតែបន្តគាំទ្រដល់កម្ពុជា ដើម្បីលើកកម្ពស់ការរីកចម្រើនប្រកបដោយបរិយាបន្ន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube