កិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តកំពង់ចាម ត្បូងឃ្មុំ ក្រចេះ និងស្ទឹងត្រែង ខេត្តកំពង់ចាម ត្បូងឃ្មុំ ក្រចេះ និងស្ទឹងត្រែង៖ នៅថ្ងៃអង្គារ-ពុធ ទី១១-១២ ខែកុម្ភៈ ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់ជាតិ អមដំណើរដោយ ឯកឧត្តម ម៉ី ម៉ារ៉ាឌី អនុរដ្ឋលេខាធិការ និងជាអនុប្រធានអចិន្ត្រៃយ៍ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់ជាតិ បានបន្តអញ្ជើញជាអធិបតីក្នុងកិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសនៅខេត្តកំពង់ចាម ត្បូងឃ្មុំ ក្រចេះ និងស្ទឹងត្រែង ដោយមានការអញ្ជើញជាសហប្រធានដឹកនាំកិច្ចប្រជុំដោយ ឯកឧត្តម ហេង វណ្ណនី អភិបាលរងនៃគណៈអភិបាលខេត្តកំពង់ចាម ឯកឧត្តម ប៉េង សម្បត្តិ អភិបាលរងនៃគណៈអភិបាលខេត្តត្បូងឃ្មុំ ឯកឧត្តម គង់ គឹមនី អភិបាលរងនៃគណៈអភិបាលខេត្តក្រចេះ និងឯកឧត្តម យឹម ផែង អភិបាលរងនៃគណៈអភិបាលខេត្តស្ទឹងត្រែង លោកស្នងការរងនគរបាលខេត្ត មេបញ្ជាការរងកងរាជអាវុធហត្ថខេត្ត មេបញ្ជាការ-មេបញ្ជាការរងកងរាជអាវុធហត្ថក្រុង-ស្រុក អភិបាល-អភិបាលរងស្រុក ប្រធាននាយកដ្ឋានសុវត្ថិភាពចរាចរណ៍ផ្លូវគោក ប្រធានមន្ទីរសាធារណការ និងដឹកជញ្ជូនខេត្ត អនុប្រធាននាយកដ្ឋានដឹកជញ្ជូនផ្លូវគោក អនុប្រធានមន្ទីរសាធារណការ និងដឹកជញ្ជូនខេត្ត នាយករង-នាយិការងរដ្ឋបាលសាលាខេត្ត អនុប្រធានសាខាពន្ធដារខេត្ត នាយការិយាល័យនគរបាលខេត្ត ប្រធាន-អនុប្រធានការិយាល័យ និងមន្រ្តីពាក់ព័ន្ធផងដែរ។ កិច្ចប្រជុំរៀបចំឡើងក្នុងគោលបំណងផ្សព្វផ្សាយសេចក្តីសម្រេចលេខ ០៣១/២៤ ចុះថ្ងៃទី៨ ខែសីហា ឆ្នាំ២០២៤ ស្តីពីការ តែងតាំង សមាសភាពក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស និងតាមដានការអនុវត្តការងាររបស់ រាជធានី ខេត្ត ពាក់ព័ន្ធនឹងការងារត្រួតពិនិត្យយានយន្តកែច្នៃខុសលក្ខណៈបច្ចេកទេស។ ក្រុមការងារថ្នាក់ជាតិ ក៏បានស្នើដល់ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តចំនួន ៦ចំណុច រួមមាន៖ ១. បន្តចុះអនុវត្តការងារឱ្យបានញឹកញាប់បន្តទៀត ២.ស្នើផ្តល់ទីតាំងកូអរដោនេចុះអនុវត្តសកម្មភាពត្រួតពិនិត្យរថយន្តកែច្នៃខុសលក្ខណៈបច្ចេកទេសក្នុងភូមិសាស្ត្រខេត្តរបស់ខ្លួន ដើម្បីងាយស្រួលតាមដានការអនុវត្តការងារ ៣.ស្នើឱ្យអាជ្ញាធរមានសមត្ថកិច្ច ចុះបិទយានដ្ឋានដែលមិនមានច្បាប់អនុញ្ញាត ៤.ស្នើឱ្យស្វែងរកយានដ្ឋានដែលមានអាជ្ញាបណ្ណ និងលក្ខណសម្បត្តិសមស្រប ដើម្បីធ្វើជាដៃគូក្នុងការកែយានយន្តខុសលក្ខណៈបច្ចេកទេសនោះឱ្យបានត្រឹមត្រូវតាមច្បាប់កំណត់វិញ ៥.ធ្វើបច្ចុប្បន្នភាពសេចក្តីសម្រេច (ថ្មី) ស្តីពីការកែសម្រួលសមាភាពក្រុមការងារកែច្នៃខុសលក្ខណៈបច្ចេកទេសខេត្ត ៦.លុបបំបាត់វប្បធម៌អន្តរាគមន៍។ គួររំលឹកថា គិតមកដល់ពេលនេះ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់ជាតិ ដឹកនាំដោយឯក រដ្ឋលេខាធិការ បានអញ្ជើញបំពេញការងារតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសថ្នាក់រាជធានី ខេត្ត បានចំនួន ១៥ខេត្ត រួចមកហើយ និងនៅសល់រាជធានី ខេត្ត ១០ទៀត រួមមាន៖ រាជធានីភ្នំពេញ ខេត្តកណ្តាល កំពង់ស្ពឺ តាកែវ កែប កំពត កោះកុង មណ្ឌលគិរី រតនគិរី និងខេត្តខេត្តព្រះសីហនុ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube