ពិធីសំណេះសំណាលជាមួយលោកគ្រូ អ្នកគ្រូ និងផ្តល់រង្វាន់ជ័យលាភីជូនសិស្សប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំ២០២៤ នៃវិទ្យាល័យក្នុងស្រុកស្អាង និងស្រុកកោះធំ នាព្រឹកថ្ងៃសៅរ៍ ទី៣០ ខែវិច្ឆិកា ឆ្នាំ២០២៤ ឯកឧត្តម ប៉េង ពោធិ៍នា អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងស្រុកកោះធំ បានអញ្ជើញជួបសំណេះសំណាលជាមួយលោកគ្រូ អ្នកគ្រូ ព្រមទាំងសិស្សានុសិស្សប្រឡងជាប់សញ្ញាបត្រមធ្យមសិក្សាទុតិយភូមិ និងជូនរង្វាន់សិស្សជ័យលាភី និទ្ទេស A សម័យប្រឡងថ្ងៃទី៨ ខែតុលា ឆ្នាំ២០២៤ នៃវិទ្យាល័យស្រុកស្អាង និងវិទ្យាល័យស្រុកកោះធំ ដោយមានការអញ្ជើញចូលរួមពី ឯកឧត្តម លោកជំទាវ ប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានក្នុងស្រុក គណៈអភិបាលស្រុក ក្រុមប្រឹក្សាស្រុក នាយក នាយករងរដ្ឋបាលស្រុក ប្រធានការិយាល័យចំណុះរដ្ឋបាលស្រុក ប្រធានក្រុមប្រឹក្សាឃុំ នាយកវិទ្យាល័យទាំង២ស្រុក លោកគ្រូ អ្នកគ្រូថ្នាក់ទី១២ និងសិស្សប្រឡងជាប់សញ្ញាបត្រមធ្យមសិក្សាទុតិយភូមិជាច្រើនរូបផងដែរ។ ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤នេះ នៅស្រុកស្អាង មានវិទ្យាល័យចំនួន ៤ ដែលមានបេក្ខជនប្រឡងជាប់សរុបចំនួន ៨៥៩នាក់ (ស្រី ៥១៩នាក់) គិតជាភាគរយ ៧៦,៤២% មានសិស្សជាប់និទ្ទេសA ១៧នាក់ (ស្រី ១០នាក់) និទ្ទេសB ៨៣នាក់ (ស្រី ៤៣នាក់) និទ្ទេសC ១៦៤នាក់ (ស្រី ១០៨នាក់) និទ្ទេសD ៣១២នាក់ (ស្រី ១៩០នាក់) និងនិទ្ទេសE ២៨៣នាក់ (ស្រី ១៦៨នាក់)។ ស្រុកកោះធំ មានវិទ្យាល័យចំនួន ៣ មានបេក្ខជនប្រឡងជាប់សរុបចំនួន ៤៩០នាក់ (ស្រី ២៨៨នាក់) គិតជាភាគរយ ៧៩,៨០% មានសិស្សជាប់និទ្ទេសA ២៩នាក់ (ស្រី ១៩នាក់) និទ្ទេសB ៦៧នាក់ (ស្រី ៣៩នាក់) និទ្ទេសC ១១៦នាក់ (ស្រី ៦៨នាក់) និទ្ទេសD ១៣៤នាក់ (ស្រី ៧៤នាក់) និងនិទ្ទេសE ១៤៤នាក់ (ស្រី ៧៩នាក់)។ ថ្លែងក្នុងអង្គពិធី ឯកឧត្តមរដ្ឋមន្រ្តី បានធ្វើការផ្តាំទៅកាន់ក្មួយៗសិស្សានុសិស្ស និងអង្គពិធីទាំងមូល ជាការកត់សម្គាល់ ឆ្នាំនេះអត្រាប្រលងជាប់ច្រើនជាងឆ្នាំមុន បើប្រៀបធៀបឆ្នាំចាស់កន្លងមក នេះជាលទ្ធផលដែលគួរឱ្យអបអរសាទរ និងជាទីមោទនចំពោះក្មួយៗទាំងអស់ ដែលបានខិតខំសិក្សារៀនសូត្ររហូតប្រលងជាប់សញ្ញាបត្រមធ្យមសិក្សាទុតិយភូមិ ក៏ដូចជាចូលរួមត្រេកអរជាមួយឳពុកម្តាយអាណាព្យាបាល លោកគ្រូ អ្នកគ្រូ ទាំងអស់ ដែលខិតខំបង្រៀន និងជួយទំនុកបម្រុងដល់ក្មួយៗរហូតទទួលបានលទ្ធផលល្អត្រចះត្រចង់ក្នុងការសិក្សានាពេលកន្លងទៅ។ ដោយសារប្រទេសយើងមានសន្តិភាព ឱកាសសម្រាប់ការសិក្សារៀនសូត្រមានច្រើន និងសូមក្មួយៗខិតខំបន្ត និងត្រូវចងចាំថាចំណេះវិជ្ជាកណ្តៀរក៏មិនកោរ កណ្តុរក៏មិនកាត់។ ក្នុងឱកាស នៃកម្មវិធីសំណេះសំណាលជាមួយសិស្សជ័យលាភី ឯកឧត្តមរដ្ឋមន្រ្តី បានប្រគល់អំណោយជារង្វាន់ជ័យលាភី និងថវិកាជូនដល់សិស្សនិទ្ទេសA ទាំងអស់ ក្នុង១រូប ទទួលបានម៉ូតូម្នាក់ ១គ្រឿង និងមួកសុវត្ថិភាពម្នាក់១ សិស្សប្រឡងជាប់បាក់ឌុប ទទួលបានថវិកា ១០ម៉ឺនរៀល លោកគ្រូ-អ្នកគ្រូ ទទួលបានថវិកាម្នាក់ ១០ម៉ឺនរៀល និងប្រជាការពារភូមិទទួលបានថវិកាម្នាក់ ១ម៉ឺនរៀល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube