កិច្ចប្រជុំពិភាក្សាកម្រិតបច្ចេកទេសលើគម្រោងផែនការចំណូល-ចំណាយថវិកាឆ្នាំ២០២៥ រវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ ភ្នំពេញ៖ ថ្ងៃពុធ ទី០៣ ខែកក្កដា ឆ្នាំ ២០២៤ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ ប្រធានប្រតិភូតំណាងក្រសួងសាធារណការ និងដឹកជញ្ជូន និងលោកជំទាវ ឈុន ដាលីន អគ្គនាយករងនៃអគ្គនាយកដ្ឋានថវិកា ប្រធានប្រតិភូតំណាងក្រសួងសេដ្ឋកិច្ច និងហិរញ្ញវត្ថុ បានធ្វើជាសហប្រធានដឹកនាំកិច្ចប្រជុំពិភាក្សាកម្រិតបច្ចេកទេសលើគម្រោងផែនការចំណូល-ចំណាយថវិកាឆ្នាំ២០២៥ ដោយមានការអញ្ជើញចូលរួមពីថ្នាក់ដឹកនាំអគ្គនាយកដ្ឋាន នាយកដ្ឋាន និងគ្រប់អង្គភាពក្រោមឱវាទក្រសួងទាំងពីរ នៅទីស្ដីការក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងពិភាក្សាលើគម្រោងផែនការចំណូល-ចំណាយថវិកាសម្រាប់ឆ្នាំ២០២៥ របស់ក្រសួងសាធារណការ និងដឹកជញ្ជូន ដើម្បីឆ្លុះបញ្ចាំងពីទិដ្ឋភាពនៃការគ្រប់គ្រងការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព។ ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានលើកឡើងថា៖ ដើម្បីចូលរួមជាមួយរាជរដ្ឋាភិបាលក្នុងការប្រើប្រាស់ថវិកាជាតិឱ្យកាន់តែមានប្រសិទ្ធភាព ក្រុមការងារបានគិតគូរយ៉ាងហ្មត់ចត់ និងច្បាស់លាស់អំពីការជ្រើសរើសសកម្មភាពអាទិភាពដាក់បញ្ចូលក្នុងទិសដៅការងារអនុវត្តសម្រាប់ឆ្នាំ២០២៥ ដោយបានរៀបចំផែនការយុទ្ធសាស្ត្រថវិកាប្រចាំឆ្នាំ(BSP) គម្រោងផែនការថវិកា(BP) និងកិច្ចការពាក់ព័ន្ធនឹងថវិកា ស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ សារាចរណែនាំ និងចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជាសម្រាប់ជាមូលដ្ឋានដាក់បញ្ចូលក្នុងកិច្ចប្រជុំពិភាក្សាកម្រិតបច្ចេកទេសថវិកាសម្រាប់ឆ្នាំ២០២៥នេះ និងសម្រាប់កិច្ចប្រជុំកម្រិតថ្នាក់ដឹកនាំ នាពេលខាងមុខ។ ជារួម ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានពិភាក្សាគ្នាប្រកបដោយស្មារតីយោគយល់ ទទួលខុសត្រូវខ្ពស់ និងប្រកបដោយផ្លែផ្កាលើការងារគ្រោងប្រមូលចំណូល និងការស្នើសុំគម្រោងចំណាយថវិកាឆ្នាំ២០២៥ ទៅតាមកម្មវិធី អនុកម្មវិធី ជំពូក គណនី អនុគណនី ដោយមួយផ្នែកបានឯកភាពក្នុងកម្រិតជំនាញ និងផ្នែកមួយចំនួនទៀតបានឯកភាពរួមគ្នាដាក់ស្នើជូនថ្នាក់ដឹកនាំនៃក្រសួងទាំងពីរ ដើម្បីជាមូលដ្ឋានក្នុងការពិនិត្យ និងសម្រេចនៅក្នុងកិច្ចប្រជុំកម្រិតថ្នាក់ដឹកនាំបន្តទៀត៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube