សិក្ខាសាលាផ្សព្វផ្សាយបញ្ចប់គម្រោងស្តីពី ការលើកកម្ពស់ការប្រើប្រាស់ម៉ូតូអគ្គិសនី ក្នុងវិស័យដឹកជញ្ជូនប្រកបដោយនិរន្តរភាព ភ្នំពេញ ៖ នៅថ្ងៃទី២៩ ខែមីនា ឆ្នាំ២០២៤ ឯកឧត្តម ឃុន សុខា អនុរដ្ឋលេខាធិការ តំណាង ឯកឧត្តម ខាន់ មារណេ រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាផ្សព្វផ្សាយបញ្ចប់គម្រោងស្តីពី ការលើកកម្ពស់ការប្រើប្រាស់ម៉ូតូអគ្គិសនី ក្នុងវិស័យដឹកជញ្ជូនប្រកបដោយនិរន្តរភាព ដែលគាំទ្រដោយកម្មវិធីសម្ព័ន្ធភាពប្រែប្រួលអាកាសធាតុកម្ពុជា និងក្រសួងបរិស្ថាន។ សិក្ខាសាលានេះមានការចូលរួមពី តំណាងក្រសួងបរិស្ថាន កម្មវិធីសម្ព័ន្ធភាពប្រែប្រួលអាកាសធាតុកម្ពុជា UNDP និង EU និងតំណាងមកពីក្រុមហ៊ុនម៉ូតូអគ្គីសនីនានា និងក្រុមហ៊ុនដឹកជញ្ជូន ព្រមទាំងថ្នាក់ដឹកនាំ និងមន្ត្រីរាជការ មកពីអង្គភាពពាក់ព័ន្ធ នៃក្រសួងសាធារណការ និងដឹកជញ្ជូន។ សិក្ខាសាលានេះធ្វើឡើងក្នុងគោលបំណងចែករំលែកចំណេះដឹងអំពីបច្ចេកវិទ្យា ក៏ដូចជាការផ្តល់នូវអត្ថប្រយោជន៍នៃម៉ូតូអគ្គិសនី ពេលប្រើប្រាស់ ដល់សិក្ខាកាមចូលរួមឱ្យទទួលបានព័ត៌មានទូលំទូលាយ ព្រមទាំងជួយជំរុញការប្រើប្រាស់យានយន្តអគ្គិសនី ក្នុងវិស័យដឹកជញ្ជូន នៅកម្ពុជា ប្រកបដោយនិរន្តរភាព៕