នារសៀលថ្ងៃអង្គារ ទី១៩ ខែកញ្ញា ឆ្នាំ២០២៣ នៅទីស្តីការក្រសួង ឯកឧត្តម មួន វាសនា រដ្ឋលេខាធិការ បានអញ្ជើញដឹកនាំកិច្ចប្រជុំផ្ទៃក្នុង នាយកដ្ឋានសវនកម្មផ្ទៃក្នុង ដើម្បីពិភាក្សាលើយន្តការរួម ក្នុងការអនុវត្តការងារសវនកម្មផ្ទៃក្នុង របស់ក្រសួងសាធារណការ និងដឹកជញ្ជូន សំដៅពង្រឹងមុខងារសវនកម្ម ឱ្យស្របតាមការវិវឌ្ឍជាក់ស្តែងបច្ចុប្បន្ន។ កិច្ចប្រជុំនេះមានការចូលរួមពី ឯកឧត្តម ភូង ភិរុណ អនុរដ្ឋលេខាធិការ ព្រមទាំងថ្នាក់ដឹកនាំ និងមន្ត្រីរាជការ នៃនាយកដ្ឋានសវនកម្មផ្ទៃក្នុងផងដែរ។ ក្នុងឱកាសនោះ លោកប្រធាននាយកដ្ឋាន បានរាយការណ៍អំពីការអនុវត្តការងារកន្លងមក បញ្ហាប្រឈម និងដំណោះស្រាយ ក៏ដូចទិសដៅអនុវត្តការងារបន្តនាពេលអនាគត ដើម្បីពង្រឹងអភិបាលកិច្ចល្អ លើកកម្ពស់ការគ្រប់គ្រងឱ្យមានប្រសិទ្ធភាព ស័ក្កសិទ្ធភាព គណនេយ្យភាព ភាពសន្សំសំចៃ និងទំនួលខុសត្រូវខ្ពស់។ ជាមួយគ្នានេះ ឯកឧត្តមរដ្ឋលេខាធិការ បានសម្តែងនូវការកោតសរសើរ ចំពោះការខិតខំប្រឹងប្រែងរបស់នាយកដ្ឋាន និងបានឯកភាពតាមស្មារតីអង្គប្រជុំដែលបានលើកមកពិភាក្សា ក្នុងនោះដែរ ឯកឧត្តមអនុរដ្ឋលេខាធិការ ក៏បានពាំនាំនូវបណ្តាំផ្ញេីរបស់ ឯកឧត្តមរដ្ឋមន្ត្រី ជូនដល់ថ្នាក់ដឹកនាំ និងមន្ត្រីនៃនាយកដ្ឋាន ត្រូវរក្សាសាមគ្គីភាពផ្ទៃក្នុង បង្កើនកិច្ចសហការ ដើម្បីដោះស្រាយបញ្ហា និងរួមគ្នាប្រកាន់ខ្ជាប់គោលការណ៍ ក្រមសីលធម៌ យុត្តិធម៌ និងតម្លាភាព៕