ទឹកប្រាក់ប្រមាណ៥០ម៉ឺនដុល្លារអាមេរិក ត្រូវបានផ្តល់ដោយវិស័យឯកជន ក្រោមកិច្ចសហការ ជាមួយរាជរដ្ឋាភិបាលកម្ពុជា ក្នុងការអនុវត្តគម្រោងសាកល្បងសុវត្ថិភាពចរាចរណ៍ក្នុងក្រុងភ្នំពេញ ដែលបច្ចុប្បន្នកំពុងមានការកកស្ទះ។ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី្កក្រសួងសាធារណការ និងដឹកជញ្ជូន បានប្រសាសន៍ថា ភាពជាដៃគូនៃវិស័យឯកជន និងសាធារណៈដំបូងបង្អស់នេះ នឹងជួយដោះស្រាយ បញ្ហាកកស្ទះចរាចរណ៍ក្នុងក្រុងភ្នំពេញ ប្រកបដោយសុវត្ថិភាព។ កម្មវិធីអភិវឌ្ឍន៍សហប្រជាជាតិ(UNDP) និងក្រុមហ៊ុនGrab នៅថ្ងៃទី៥ ខែមិថុនា ឆ្នាំ២០១៨ នេះ បានចុះហត្ថលេខាលើកិច្ចព្រមព្រៀងនៃគម្រោងមូលនិធិរួមគ្នាដំបូងបង្អស់ ក្នុងគោលដៅគាំទ្រដល់កិច្ចប្រឹងប្រែងរបស់រាជរដ្ឋាភិបាល ក្នុងការពង្រឹងសុវត្ថិភាព និងនិរន្តរភាពនៃចរាចរណ៍ក្នុងទីក្រុងភ្នំពេញ បន្ទាប់ពីបានប្រកាសជាផ្លូវការនាពេលថ្មីៗនេះ អំពីកិច្ចសហការរវាងស្ថាប័នទាំងពីរលើការកាត់បន្ថយការកកស្ទះចរាចរណ៍ និងការបំពុលខ្យល់អាកាសក្នុងទីក្រុង។ ថ្លែងប្រាប់អ្នកសារព័ត៌មាន ក្រោយពីចូលរួមជាអធិបតីយភាពក្នុងពិធីចុះហត្ថលេខាលើកិច្ចព្រមព្រៀងនៃគម្រោងមូលនិធិរួមគ្នានេះ លោកទេសរដ្ឋមន្ត្រី ស៊ុន ចាន់ថុល មានប្រសាសន៍ថា ថវិកាជំនួយពីក្រុមហ៊ុនGrab និង UNDP ប្រមាណ៥០ម៉ឺនដុល្លារអាមេរិក នឹងត្រូវបានប្រើប្រាស់សម្រាប់ការសិក្សារយៈពេល៣ឆ្នាំ ពីតម្លាយផ្លូវដែលកំពុងកកស្ទះចរាចរណ៍នៅក្នុងទីក្រុងភ្នំពេញ។ លោកថ្លែងថា «គម្រោងរួមគ្នាស្តីពីនិរន្តរភាពចរាចរណ៍ក្នុងទីក្រុងភ្នំពេញនេះ មានគោលបំណងធ្វើ ឱ្យប្រសើរឡើងទាំងគុណភាព និងការចងក្រងនៃទិន្ន័យចរាចរណ៍ ដែលចាំបាច់សម្រាប់ការបង្កើតនូវ គោលនយោបាយ និងការវិនិយោគនានា ក្នុងការដោះស្រាយបញ្ហាចរាចរណ៍ក្នុងទីក្រុងប្រកបដោយ ភាពឆ្លាតវៃ និងនិរន្តរភាព»។ លោក Russell Cohen នាយកប្រចាំតំបន់ផ្នែកប្រតិបត្តិការរបស់ក្រុមហ៊ុនGrab មាន ប្រសាសន៍ថា កិច្ចសហការជាមួយUNDPនេះ គឺដើម្បីធ្វើឱ្យសម្រេចនូវទស្សនវិស័យ និងឆន្ទៈរួមក្នុងការកាត់បន្ថយការបំពុលខ្យល់អាកាស ក៏ដូចជាការបង្កើនសុវត្ថិភាព និងប្រសិទ្ធិភាពនៃចរាចរណ៍តាមដងផ្លូវ។ លោកបន្តថា ក្រៅពីការគាំទ្រផ្នែកហិរញ្ញវត្ថុ ក្រុមហ៊ុនGrab ក៏បានប្តេជ្ញាផ្តល់នូវការ គាំទ្រផ្សេងៗទៀតដូចជា ការចែករំលែកទិន្ន័យ ការផ្តល់ជាបច្ចេកវិទ្យា ធនធានមនុស្ស ព្រមទាំងការលើកកម្ពស់ការប្រើយានយន្តបែបបរិស្ថាន ក្នុងចំណោមអ្នកបើកបរដៃគូ និងអ្នកដំណើរ។ លោក Nick Beresford នាយកប្រចាំប្រទេសកម្ពុជារបស់UNDP មានប្រសាសន៍ថា« គម្រោងនិរន្តរភាពចរាចរណ៍ក្នុងទីក្រុងសម្រាប់គ្រប់គ្នានេះ មានតួនាទីលើសពីអ្វីដែលយើងហៅថា ជាទំនួលខុសត្រូវសង្គមទៅទៀត ហើយវាផ្តល់នូវម៉ូដែលថ្មីមួយសម្រាប់ភាពជាដៃគូនៃវិស័យឯកជន និងសាធារណៈ ក្នុងការងារអភិវឌ្ឍសង្គម។ គម្រោងនេះ ក៏ជាវេទិកាមួយជួយគាំទ្រដល់ការបង្កើតគោលនយោបាយនានា ដែលជំរុញឱ្យមានការវិនិយោគកាន់តែច្រើនលើការអភិវឌ្ឍ ទីក្រុងប្រកបដោយចីរភាព»។ យោងតាមកិច្ចព្រមព្រៀងគ្នារវាងភាគីទាំងពីរនេះ បានបញ្ជាក់ថា ការអនុវត្តគម្រោងនេះ ផ្តោតការគាំទ្រលើការធ្វើឱ្យប្រសើរឡើងនូវប្រសិទ្ធិភាពនៃចរាចរណ៍ក្នុងទីក្រុងសព្វថ្ងៃ និងប្រព័ន្ធដឹកជញ្ជូន តាមរយៈការប្រមូលចងក្រងទិន្ន័យចរាចរណ៍ និងគុណភាពខ្យល់ក្នុងទីក្រុងភ្នំពេញ ព្រមទាំងការកាត់បន្ថយការបំភាយឧស្ម័នផ្ទះកញ្ចក់ពីចរាចរណ៍ក្នុងទីក្រុង តាមរយៈវិធានការពាក់ព័ន្ធនឹងប្រេងឥន្ធនៈ និងការប្រើប្រាស់យានយន្តបែបបរិស្ថាន និងការលើកកម្ពស់ភាពច្នៃប្រឌិតក្នុងការដោះស្រាយ បញ្ហាចរាចរណ៍ដោយភាពឆ្លាតវៃក្នុងគោលបំណងពន្លឿនវឌ្ឍនភាពផ្នែកសុវត្ថិភាព និងចរាចរណ៍ សម្រាប់គ្រប់គ្នា។ យោងតាមរបាយការណ៍របស់ក្រសួងសាធារណការ និងដឹកជញ្ជូន បានបង្ហាញថា ចំនួនរថយន្ត និងទោចក្រយានយន្តដែលបានចុះបញ្ជីត្រឹមត្រូវក្នុងទីក្រុងភ្នំពេញ ជាមធ្យមមានកំណើនប្រមាណជា២០ភាគរយ រៀងរាល់ឆ្នាំ ហើយបច្ចុប្បន្នមានចំនួនរហូតដល់៤លាន៥សែនគ្រឿង៕