ផ្លូវល្បឿនលឿនបានក្លាយជាផ្លូវដ៏សំខាន់ និងពេញនិយមនាពេលបច្ចុប្បន្ន សម្រាប់ការធ្វើដំណើរ។ ជាក់ស្ដែងផ្លូវល្បឿនលឿនទី១ ដែលតភ្ជាប់ពីភ្នំពេញទៅក្រុងព្រះសីហនុ ដែលទើបបើកឲ្យដំណើរការថ្មីៗកន្លងទៅនេះ គឺមានអ្នកធ្វើដំណើរច្រើន។ ក្នុងនោះដែរ នៅពាក់កណ្ដាលឆ្នាំ២០២៣នេះ កម្ពុជាក៏នឹងបើកការដ្ឋានសាងសង់ផ្លូវល្បឿនមួយខ្សែទៀតដែលតភ្ជាប់ពីភ្នំពេញទៅក្រុងបាវិតមួយទៀតផងដែរ។ យ៉ាងក្រៅពីគម្រោងផ្លូវខាងលើ បច្ចុប្បន្នក្រសួងសាធារណការ និងដឹកជញ្ជូន បានកំពុងសិក្សាសាងសង់ផ្លូវល្បឿនលឿន ២ ខ្សែទៀតផងដែរ ដែលតភ្ជាប់ពីភ្នំពេញទៅក្រុងសៀមរាប១ខ្សែ​ និងពីភ្នំពេញទៅក្រុងប៉ោយប៉ែត ១ ខ្សែ។ ១. ផ្លូវល្បឿនលឿនភ្នំពេញ-ក្រុងប៉ោយប៉ែត បច្ចុប្បន្នគម្រោងផ្លូវមួយនេះ ត្រូវបានក្រុមហ៊ុនឯកជនកំពុងធ្វើការសិក្សាដើម្បីសាងសង់ ខណៈគម្រោងនេះក៏មានការអនុញ្ញាតពីក្រសួងសាធារណការ និងដឹកជញ្ជូនផងដែរ។ យោងតាមប្រសាសន៍របស់ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានបញ្ជាក់ថា «យើងបានអនុញ្ញាតឲ្យក្រុមហ៊ុនហ្នឹងសិក្សា យើងអត់មានបញ្ហាទេ ឲ្យតែគាត់ដាក់ទុននៅកម្ពុជាយើងគាត់ធ្វើចុះ»។ ហើយតាមការបញ្ជាក់បន្ថែមពីឯកឧត្ដមទេសរដ្ឋមន្ដ្រី ផ្លូវនេះគឺនឹងសាងសង់ភ្ជាប់ពីភ្នំពេញទៅខេត្ដបាត់ដំបង ហើយឡើងទៅកាន់ក្រុងប៉ោយប៉ែតខេត្ដបន្ទាយមានជ័យតែម្ដង។ ២. ផ្លូវល្បឿនលឿនភ្នំពេញ-ក្រុងសៀមរាប យោងតាមការលើកឡើងពីឯកឧត្ដម ស៊ុន ចាន់ថុល ដដែលកាលពីពេលថ្មីៗកន្លងទៅ ក៏បានបញ្ជាក់ឲ្យដឹងដែរថា បច្ចុប្បន្ននេះក្រសួងបានកំពុងធ្វើការសិក្សាដើម្បីសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅខេត្ដសៀមរាប ដែលជាផ្លូវល្បឿនលឿនទី៣នៅកម្ពុជា។ ក្នុងនោះ បើតាមការបញ្ជាក់សាងធារណការ និងដឹកជញ្ជូន គម្រោងនេះក៏នឹងត្រូវសាងសង់ឆ្លងកាត់ខេត្ដកំពង់ធំផងដែរ។ តាមការលើកឡើងដំបូងបំផុតរបស់ឯកឧត្ដម ស៊ុន ចាន់ថុល គម្រោងផ្លូវល្បឿនលឿនភ្នំពេញទៅខេត្ដសៀមរាបនេះ គឺមានក្រុមហ៊ុនធំៗចំនួន ៤ បានដាក់ពាក្យស្នើសុំមកក្រសួងដើម្បីធ្វើការសិក្សាសាងសង់៕