បទពិសោធន៍ នៃការគ្រប់គ្រង និងតាមដានការអនុវត្តគម្រោងហេដ្ឋារចនាសម្ព័ន្ធ ក្រោមហិរញ្ញប្បទានពីដៃគូអភិវឌ្ឍន៍ ត្រូវបានបន្តលើកយកមកពិភាក្សា (PANEL DISCUSSION) ក្នុងពិធីសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងសាធារណការ និងដឹកជញ្ជូន នារសៀលថ្ងៃទី៥ ខែកុម្ភៈ ឆ្នាំ២០២៦ ទីស្តីការក្រសួង៖ នារសៀលថ្ងៃព្រហស្បតិ៍ ទី៥ ខែកុម្ភៈ ឆ្នាំ២០២៦ ក្នុងពិធីសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ ក្រោមអធិបតីភាពដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានរៀបចំក្រុមពិភាក្សាទី២ ស្តីពីបទពិសោធន៍នៃការគ្រប់គ្រង និងតាមដានការអនុវត្តគម្រោងហេដ្ឋារចនាសម្ព័ន្ធ ក្រោមហិរញ្ញប្បទានពីដៃគូអភិវឌ្ឍន៍ ដោយមានការ ចូលរួមពីវាគ្មិនកិត្តិយសដែលជាថ្នាក់ដឹកនាំនាយកគ្រប់គ្រង និងប្រធានគ្រប់គ្រងគម្រោងមានបទពិសោធន៍ជាច្រើនឆ្នាំក្នុងការគ្រប់គ្រងគម្រោងអភិវឌ្ឍន៍ហេដ្ឋារចនាសម្ព័ន្ធរបស់ក្រសួង។ កិច្ចពិភាក្សានារសៀលនេះ បានប្រព្រឹត្តទៅយ៉ាងផុសផុល និងរស់រវើក ដោយផ្ដោតសំខាន់លើការគ្រប់គ្រង និងតាមដានការអនុវត្តគម្រោងហេដ្ឋារចនាសម្ព័ន្ធ ក្រោមហិរញ្ញប្បទានពីដៃគូអភិវឌ្ឍន៍ ពិសេសទៅលើបទពិសោធន៍ល្អៗ ក្នុងការដោះស្រាយបញ្ហាប្រឈមនៅគ្រប់ដំណាក់កាលនៃការអនុវត្ត និងការសម្រសម្រួលជាមួយដៃគូហិរញ្ញប្បទាន ក្រុមហ៊ុនទីប្រឹក្សា ក្រុមហ៊ុនសាងសង់ និងក្រសួងស្ថាប័នពាក់ព័ន្ធ ព្រមទាំងវិធីសាស្ត្រល្អរៗក្នុងការតាមដានការអនុវត្តគម្រោងក្រោមហិរញ្ញប្បទានដៃគូអភិវឌ្ឍន៍ឱ្យមានប្រសិទ្ធិភាព គុណភាពស្របតាមបទដ្ឋានបច្ចេកទេស ទាន់ពេលវេលាស្របតាមតាមផែនការ សំដៅធ្វើយ៉ាងណាអោយគម្រោងទាំងនេះនាំមកនូវអត្ថប្រយោជន៍ និងសារៈសំខាន់ដល់វិស័យសេដ្ឋកិច្ច និងសង្គមកិច្ចរបស់កម្ពុជា។ គម្រោងដែលត្រូវបានលើកមកពិភាក្សារួមមានដូចជា គម្រោងកែលម្អផ្លូវជាតិលេខ៤ ក្រោមកម្ចីឥណទានពីធនាគារពិភពលោក គម្រោងសាងសង់ផ្លូវជាតិលេខ១០ ក្រោមហិរញ្ញប្បទានហិរញ្ញប្បទានសហប្រតិបត្តិការជាមួយប្រទេសចិន គម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្រុងតាខ្មៅ ក្រោមហិរញ្ញប្បទានសហប្រតិបត្តិការជាមួយសាធារណរដ្ឋកូរ៉េ គម្រោងបណ្តាញហេដ្ឋារចនាសម្ព័ន្ធផ្លូវនៅតំបន់ភូមិភាគឦសាន្ត ក្រោមក្របខ័ណ្ឌជំនួយបច្ចេកទេសធនាគារវិនិយោគហេដ្ឋារចនាសម្ព័ន្ធអាស៊ី គម្រោងអភិវឌ្ឍន៍ទីក្រុងគួរឱ្យចង់រស់នៅ ក្រោមឥណទានសម្បទានពីធនាគារអភិវឌ្ឍអាស៊ី និងគម្រោងលើកកម្រិតផ្លូវជាតិលេខ៥ ក្រោមហិរញ្ញប្បទានសហប្រតិបត្តិការជាមួយប្រទេសជប៉ុន៕