ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា ផ្លូវជាតិលេខ៥ដើរតួនាទីយ៉ាងសំខាន់ក្នុងទំនាក់ទំនងក្នុងរវាងប្រទេសកម្ពុជា និងប្រទេសជិតខាង ពិសេសផ្ដល់នូវឱកាសសម្រាប់ការរីកលូតលាស់សេដ្ឋកិច្ចក្នុងផ្ទៃប្រទេសកម្ពុជា និងក្របខ័ណ្ឌអាស៊ាន ព្រមទាំងរបៀងសេដ្ឋកិច្ចខាងត្បូងរបស់មហាអនុតំបន់មេគង្គ GMS ។ ក្នុងពិធីបើកការដ្ឋានសាងសង់កំណាត់ផ្លូវជាតិលេខ ៥ប្រវែង ១៣៥,២៤គីឡូម៉ែត្រ (ព្រែកក្ដាម-ធ្លាម្អម) ក្រោមហិរញ្ញប្បទានសម្បទានពីរដ្ឋាភិបាលជប៉ុន នាព្រឹកថ្ងៃចន្ទ ៧កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ២១ ខែឧសភា ឆ្នាំ២០១៨ នៅឃុំទឹកហូត ស្រុករលាប្អៀរ ខេត្តកំពង់ឆ្នាំ សម្ដេចតេជោនាយករដ្ឋមន្ត្រី បានថ្លែងអំណរគុណចំពោះរដ្ឋាភិបាលនិងប្រជាជនជប៉ុន ដែលបានផ្ដល់នូវឥណទាន និងជំនួយឥសំណងសម្រាប់ការអភិវឌ្ឍន៍កម្ពុជា។ សម្ដេចតេជោបន្តថា គម្រោងធ្វើឲ្យប្រសើរឡើងនូវផ្លូវជាតិលេខ៥នេះ គឺកើតឡើងក្នុងទំនាក់ទំនងរវាងសម្តេច និង ឯកឧត្ដម Shinzō Abe នាយករដ្ឋមន្ត្រីជប៉ុន ក្នុងពេលដែល សម្តេចតេជោ បានអញ្ជើញទស្សនកិច្ចនៅប្រទេសជប៉ុនជាបន្តបន្ទាប់នាពេលកន្លងមកនេះ។ ប្រទេសជប៉ុននឹងជួយកសាងលើកំណាត់ផ្លូវជាតិលេខ៥នេះ ជាដំណាក់កាលៗចាប់ពីទីក្រុងភ្នំពេញរហូតដល់ខេត្តបន្ទាយមានជ័យ ព្រំដែនកម្ពុជា-ថៃ ដែលមានប្រវែងប្រមាណជា៣៧០គីឡូម៉ែត្រ។ ផ្លូវជាតិលេខ៥នេះពិតមានសារៈសំខាន់ណាស់ សម្រាប់ការធ្វើដំណើររបស់បងប្អូនប្រជាពលរដ្ឋទៅតាមបណ្តាខេត្តផ្សេងៗដូចជា ខេត្តកណ្តាល, កំពង់ឆ្នាំង, ពោធិសាត់, បាត់ដំបង និងបន្ទាយមានជ័យ (ប៉ោយប៉ែត) ជាពិសេស គឺនឹងបានរួមចំណែកក្នុងការបំរើលើវិស័យសេដ្ឋកិច្ច ពាណិជ្ជកម្ម ឱ្យកាន់តែរីកចម្រើន និងដើម្បីលើកស្ទួយជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងថែមទៀត។ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឲ្យដឹងថា គម្រោងសាងសង់កំណាត់ផ្លូវជាតិលេខ៥ ឆ្លងកាត់ខេត្តចំនួន០៣ រួមមាន ខេត្តកណ្តាល ប្រវែង ៤.២៥គីឡូម៉ែត្រ ខេត្តកំពង់ឆ្នាំង ប្រវែង ៩៣.៥៤គីឡូម៉ែត្រ និងខេត្តពោធិ៍សាត់ ប្រវែង ៣៧.៤៥គីឡូម៉ែត្រ។ គម្រោងសាងសង់កំណាត់ផ្លូវជាតិលេខ៥នេះ គ្រោងចំណាយថវិកាសរុបប្រមាណ ២៦១លានដុល្លារអាម៉េរិក ជាហិរញ្ញប្បទានសម្បទានពីរដ្ឋាភិបាលជប៉ុន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន យុទ្ធភ័ណ្ឌមិនទាន់ផ្ទុះ និងពន្ធអាករ។ ការសាងសង់ផ្លូវនេះគ្រោងប្រើរយៈពេល ៤៨ខែ គិតចាប់ពីខែមេសា ឆ្នាំ២០១៨ រហូតដល់ខែមីនា ឆ្នាំ២០២២។ ឯកឧត្ដមរដ្ឋមន្ត្រីបានបន្តថា គម្រោងសាងសង់កំណាត់ផ្លូវជាតិលេខ៥ ចាប់ពីព្រែកក្តាម ខេត្តកណ្តាល ដល់ធ្លាម្អម ខេត្តពោធិ៍សាត់ គឺជាកំណាត់ផ្លូវផ្នែកខាងត្បូង នៃគម្រោងធ្វើឲ្យប្រសើរឡើងកំណាត់ផ្លូវជាតិលេខ៥ ចាប់ពីព្រែកក្តាម ដល់ប៉ោយប៉ែត ក្រោមហិរញ្ញប្បទានសម្បទានពីរដ្ឋាភិបាលជប៉ុន ដោយកំណាត់ផ្លូវផ្នែកខាងជើង ចាប់ពីបាត់ដំបង ដល់សិរីសោភ័ណប្រវែង ៨៤.៧៤គីឡូម៉ែត្រ ត្រូវបានបើកការដ្ឋានសាងសង់កាលពីខែមីនា ឆ្នាំ២០១៨ កន្លងទៅថ្មីៗនេះ។ កំណាត់ផ្លូវផ្នែកកណ្តាល ចាប់ពីធ្លាម្អម ដល់បាត់ដំបង បូកនិងពីសិរីសោភ័ណ ដល់ប៉ោយប៉ែត ប្រវែងសរុប ១៤៦.០៤គីឡូម៉ែត្រ បានបញ្ចប់ការជ្រើសរើសក្រុមហ៊ុនទីប្រឹក្សា ត្រួតពិនិត្យបច្ចេកទេស និងកំពុងស្ថិតក្នុងដំណាក់កាលនៃនីតិវិធីរៀបចំឯកសារសម្រាប់ ការដេញថ្លៃជ្រើសរើសក្រុមហ៊ុនសាងសង់ ហើយគ្រោងចាប់ផ្តើមបើកការដ្ឋានសាងសង់ នៅក្នុងអំឡុងខែវិច្ឆិកា ឆ្នាំ២០១៨ ខាងមុខនេះ៕