ឯកឧត្តមទេសរដ្ឋមន្ត្រី ស៊ុន ចាន់ថុល ដឹកនាំមន្ត្រីរាជការចូលរួមពិធីកាន់បិណ្ឌវេនទី១១ របស់ក្រសួងសាធារណៈការ និងដឹកជញ្ជូន នៅវត្តបុទុមវតីរាជរារាម ឋិតនៅរាជធានីភ្នំពេញ នៅក្នុងរដូវកាន់បិណ្ឌរបស់ព្រះពុទ្ធសាសនិកខ្មែរ ថ្ងៃអង្គារ-ពុធ ១០-១១រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ២០-២១ ខែកញ្ញា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំមន្ត្រីរាជការក្រសួងចូលរួមពិធីកាន់បិណ្ឌវេនទី១១ នៅវត្តបុទុមវតីរាជរារាម ឋិតនៅក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ដោយមានការប្រារព្វពិធីតាមប្រពៃណីព្រះពុទ្ធសាសនាខ្មែរយើង រួមមានដូចជា៖ នមស្ការព្រះរតនត្រ័យ សមាទានសីល ចម្រើនព្រះបរិត្ត សម្តែងធម៌ទេសនា បោះបាយបិណ្ឌ ប្រគេនយាគូព្រះសង្ឃចំនួន៤៤១អង្គ និងរាប់បាត្រដារឆ្លងជាកិច្ចបង្ហើយបុណ្យ។ កម្មវិធីនេះប្រារព្វឡើងក្នុងគោលបំណងដើម្បីឧទិសកុសលផលបុណ្យជូនដល់មាតាបិតា ញាតិការក្នុងសង្សារវដ្ត និងឧទ្ទិសជូនបុណ្យកុសលដល់ក្រុមគ្រួសារមន្ត្រីរាជការក្រោមឱវាទ ក្រសួង ព្រមទាំងប្រជាពលរដ្ឋខ្មែរនៅទូទាំងប្រទេស ឱ្យទទួលបានសេចក្តីសុខសេចក្តីចម្រើន ជាពិសេសសុខសន្តិភាព និងការអភិវឌ្ឍក្រោមការដឹកនាំដ៏ភ្លឺស្វាងរបស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ទន្ទឹមជាមួយគ្នានោះដែរ កាលពីព្រឹកថ្ងៃអង្គារ ១០រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹង ថ្ងៃទី២០ ខែកញ្ញា ឆ្នាំ២០២២ ឯកឧត្តមទេសរដ្ឋមន្ត្រី ក៏បានដឹកនាំមន្ត្រីរាជការក្រសួង នាំយកទេយ្យវត្ថុទៅប្រគេនព្រះសង្ឃនៅវត្តសារាវន្តតេជោ ឋិតនៅរាជធានីភ្នំពេញ នាថ្ងៃបិណ្ឌទី១០ផងដែរ៕