រដ្ឋបាលស្រុកស្រែអំបិល ខេត្តកោះកុង បានបំពេញក្តីបំណងរបស់ប្រជាពលរដ្ឋរស់នៅចំណុចផ្សារក្រោម ភូមិស្រែអំបិល ឃុំស្រែអំបិល ដោយអភិវឌ្ឍន៍ជាផ្លូវបេតុងប្រវែង៥៧០ម៉ែត្រ និងទទឹង៦ម៉ែត្រ។ឆ្លើយតបនឹងការមើលឃើញពីការលំបាក និងតម្រូវការចាំបាច់របស់ពលរដ្ឋ អាជ្ញាធរស្រុកស្រែអំបិល បានទម្លាក់គម្រោងមូលនិធិអភិវឌ្ឍន៍កសាងផ្លូវបេតុង១ខ្សែប្រវែង៥៧០ម៉ែត្រ ទទឹង៦ម៉ែត្រ និងកម្រាស់១តឹកកន្លះជូនប្រជាពលរដ្ឋនៅចំណុចផ្សារក្រោម។លោក ជា ច័ន្ទកញ្ញា អភិបាលស្រុកស្រែអំបិល អះអាងរសៀលថ្ងៃទី២៤ ខែធ្នូ ឆ្នាំ២០២៥ថា កន្លងទៅនេះ ពលរដ្ឋរបស់លោកពិតជាលំបាកចរាចរណ៍ធ្វើដំណើរទៅមកណាស់ ដោយសារតែស្ថានភាពផ្លូវក្រួសក្រហមមានជង្ហុកតូចធំៗនារដូវវស្សា។ ដូច្នេះទើបលោក និងក្រុមប្រឹក្សាស្រុក លើកជាគម្រោងអភិវឌ្ឍន៍ផ្លូវបេតុងខាងលើជូនប្រជាពលរដ្ឋតែម្តង ដើម្បីសុវត្ថិភាពក្នុងការធ្វើដំណើរ ដឹកជញ្ជូនទិន្នផលនេសាទទៅកាន់ទីផ្សារបានឆាប់រហ័សផងដែរ។លោកអភិបាលស្រុកស្រែអំបិល ក៏សំណូមពរដល់ប្រជាពលរដ្ឋរស់នៅសងខាងផ្លូវដែលទើបនឹងកសាងរួចរាល់ខាងលើ មេត្តាចូលរួមថែរក្សាការពារផ្លូវឱ្យបានល្អចំពោះការប្រើប្រាស់គង់វង្សយូរអង្វែង ដោយកុំដឹកលើសទម្ងន់កំណត់ កុំជីកកាយ ឬចាក់អាចម៍ដីបិទផ្លូវទឹក និងកុំចោលសំរាមគ្មានសណ្តាប់ធ្នាប់ជាដើម។អ្នកស្រី គឹម ហុង និងលោក ឈីវ ដែលជាពលរដ្ឋរស់នៅចំណុចផ្សារក្រោម ភូមិស្រែអំបិល បានបង្ហាញក្តីរីករាយជាខ្លាំងនៅពេលទទួលបានសមិទ្ធផលជាផ្លូវបេតុងថ្មីស្រឡាងប្រើប្រាស់លែងលំបាកធ្វើដំណើរដូចពេលមុនៗទៀតហើយ។ ព្រោះថាកន្លងទៅ លំបាកធ្វើដំណើរខ្លាំងជាងគេគឺរដូវវស្សារអិលផុងប្រឈមនឹងគ្រោះថ្នាក់ផ្សេងៗ។តំណាងពលរដ្ឋក៏ទទួលយកការសំណូមពររបស់រដ្ឋបាលស្រុក ដោយពួកគាត់នឹងចូលរួមថែរក្សាអនាម័យលើផ្លូវអោយបានល្អប្រសើរ រាយការណ៍ទៅអាជ្ញាធរ ករណីឃើញមានការដឹកលើសទម្ងន់កំណត់ ឬជីកកាយបិទផ្លូវទឹកគ្មានការអនុញ្ញាត។ ទន្ទឹមនោះពលរដ្ឋជឿជាក់ថា អាជ្ញាធរនឹងបន្តកសាងផ្លូវបន្តទៀត គ្រានៅសេសសល់មិនទាន់ស្ថាបនារួច៕