កិច្ចប្រជុំពិនិត្យតាមដាន និងជំរុញការអនុវត្តគម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ ២២ ថ្ងៃពុធ ៥រោច ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែសីហា ឆ្នាំ២០២២ នៅទីស្តីការក្រសួង ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស បានអញ្ជើញជួបពិភាក្សាការងារជាមួយលោកស្រី Minnie Chey នាយិកានៃមូលនិធិសហប្រតិបត្តិការកូរ៉េសម្រាប់ការអភិវឌ្ឍសេដ្ឋកិច្ចប្រចាំកម្ពុជា(EDCF) ដោយមានការចូលរួមពីសមាជិកនៃអង្គភាពគ្រប់គ្រងគម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ តំណាងអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ និងតំណាងអគ្គនាយកដ្ឋានសហប្រតិបត្តិការអន្ដរជាតិ និងគ្រប់គ្រងបំណុលនៃក្រសួងសេដ្ឋកិច្ច និងហិរញ្ញវត្ថុ ព្រមទាំងមន្រ្ដីបច្ចេកទេសពាក់ព័ន្ធ ដើម្បី ជជែកពិភាក្សា និងពិនិត្យមើលវឌ្ឍនភាព និងបញ្ហាប្រឈមមួយចំនួនក្នុងគោលបំណងជំរុញការងារអនុវត្តគម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ ឱ្យទទួលបានវឌ្ឍនភាពបន្ថែមទៀត។ ជាកិច្ចចាប់ផ្តើម ឯកឧត្តម ហេង រត្នពិសិដ្ឋ បានជម្រាបជូនអង្គប្រជុំអំពីរបៀបវារៈ និងគោលបំណងនៃកិច្ច ប្រជុំ និងបានអនុញ្ញាតឱ្យក្រុមហ៊ុនទីប្រឹក្សាបច្ចេកទេសធ្វើបទបង្ហាញអំពីវឌ្ឍនភាព និងបញ្ហាប្រឈមជូន អង្គប្រជុំដើម្បីជាមូលដ្ឋានក្នុងការពិនិត្យ និងពិភាក្សាដោះស្រាយ។ តាមរយៈការស្តាប់របាយការណ៍ និងការជជែកពិភាក្សាដោយមានការចូលរួមមតិយោបល់ពីភាគីពាក់ព័ន្ធ អង្គប្រជុំអាចកំណត់បាននូវបញ្ហាពាក់ព័ន្ធ ហើយជាលទ្ធផល អង្គប្រជុំបានពិនិត្យសម្រេច និងបានណែនាំ ឱ្យក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេសបន្តជំរុញការងារអនុវត្ត រួមមានដូចជា៖ ១) ក្រុមហ៊ុនសាងសង់ ត្រូវអនុវត្តការងារជួសជុល និងថែទាំផ្លូវឱ្យបានត្រឹមត្រូវតាមកិច្ចសន្យា ដើម្បីធានានូវសុវត្ថិភាពក្នុងការធ្វើចរាចរណ៍ទៅមក ជៀសវាងបញ្ហាគ្រោះថ្នាក់ផ្សេងៗ ២) ក្រុមហ៊ុនសាងសង់ ត្រូវអនុវត្ត ការងារទាំងឡាយស្របតាមទំហំការងារ ដែលមានចែងក្នុងកិច្ចសន្យាឱ្យបានត្រឹមត្រូវ និងទាន់ពេលវេលា ៣) ក្រុមហ៊ុនទីប្រឹក្សាបច្ចេកទេសត្រូវធ្វើការពិនិត្យលើតម្លៃនៃទំហំការងារបន្ថែមពិតប្រាកដ និងដាក់ជូនមកអង្គភាពគ្រប់គ្រងគម្រោង(PMU) ឱ្យបានរួចរាល់ត្រឹមចុងសប្ដាហ៍នេះ ៤) ក្រុមហ៊ុនសាងសង់ និង ក្រុមហ៊ុនទីប្រឹក្សាបច្ចេកទេសត្រូវសហការជាមួយអាជ្ញាធរមូលដ្ឋាន និងគ្រប់ភាគីពាក់ព័ន្ធ ដើម្បីដោះ ស្រាយផលប៉ះពាល់ដែលនៅសេសសល់ឱ្យបានរួចរាល់ និងទប់ស្កាត់ការដឹកជញ្ជូនលើសទម្ងន់កម្រិត កំណត់ដោយច្បាប់ផងដែរ។ ជាទីបញ្ចប់ ឯកឧត្តមអគ្គនាយក បានថ្លែងអំណរគុណដល់អង្គប្រជុំដែលបានអញ្ជើញចូលរួម និងផ្ដល់កិច្ច សហការការងារពាក់ព័ន្ធកន្លងមក និងបានជំរុញឱ្យមានការរៀបចំកិច្ចប្រជុំជាបន្តបន្ទាប់ទៀត ដើម្បីពិនិត្យ វឌ្ឍនភាពការងារ និងជំរុញការអនុវត្តគម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ ដើម្បីឱ្យគម្រោងអាចអនុវត្តបញ្ចប់ទាន់ពេលវេលា ប្រកបដោយគុណភាព និងប្រសិទ្ធភាព៕