ក្រសួងសាធារណការ និងដឹកជញ្ជូន នឹងដាក់ឱ្យដំណើរនូវកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅ ជាបណ្តោះអាសន្នចាប់ពីថ្ងៃស្អែកនេះហើយ ដោយប្រើប្រាស់កាណូត៣គ្រឿង និងមានស្ថានីយរង់ចាំអ្នកដំណើរ៤កន្លែង។ សេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន នៅថ្ងៃទី៥ ខែមេសានេះ បានបញ្ជាក់ថា លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នឹងអញ្ជើញជាអធិបតីភាពនៅក្នុងពិធីបើកឱ្យប្រើប្រាស់ជាបណ្តោះអាសន្នគម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅ ដែលនឹងប្រព្រឹត្តិទៅនៅថ្ងៃទី៦ ខែមេសា ឆ្នាំ២០១៨ វេលាម៉ោង៧ព្រឹក នៅស្ថានីយនាវាដឹកអ្នកដំណើរឬស្សីកែវ គីឡូម៉ែត្រលេខ៦ ចំណុចទីលានប្រជាធិបតេយ្យថ្មី។ ការដាក់ឱ្យប្រើប្រាស់ជាបណ្តោះអាសន្នគម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅនេះ បានចូលរួមចំណែកដល់ការផ្តល់មធ្យោបាយធ្វើដំណើរបន្ថែមទៀតជូនប្រជាពលរដ្ឋ ចំណេញពេលវេលា និងកាត់បន្ថយការចំណាយរបស់ប្រជាពលរដ្ឋ ព្រមទាំងចូលរួមកាត់បន្ថយការកកស្ទះចរាចរណ៍នៅតាមដងផ្លូវផងដែរ។ ប្រជាពលរដ្ឋអាចធ្វើដំណើរតាមកាណូតដឹកអ្នកដំណើរនេះ ដោយឥតគិតថ្លៃ រហូតដល់ថ្ងៃទី១ ខែសីហា ឆ្នាំ២០១៨។ ការដឹកជញ្ជូនអ្នកដំណើរតាមផ្លូវទឹកពីកំពង់ព្រែកព្នៅ រាជធានីភ្នំពេញ ទៅក្រុងតាខ្មៅខេត្តកណ្តាល ដោយឆ្លងកាត់ស្ថានីយ៍រង់ចាំអ្នកដំណើរចំនួន៦កន្លែង មានដូចជា៖ កំពង់ផែព្រែកព្នៅ កំពង់ផែមុខឃ្លាំងសាំងឫស្សីកែវ កំពង់ផែផែបណ្តែត កំពង់ផែណាហ្គា កំពង់ផែភូមិដើមចាន់ច្បារអំពៅ និងកំពង់ផែសួនច្បារតាខ្មៅ ក្នុងគម្រោងប្រើប្រាស់កាណូតចំនួន៤គ្រឿង ក្នុងនោះ២គ្រឿង ត្រូវបានបញ្ជាទិញពីប្រទេសវៀតណាម និង២គ្រឿងទៀត ជាការជួសជុលកាណូត ដែលមានស្រាប់នៅក្នុងស្រុកឡើងវិញ៕