ក្រសួងសាធារណការ និងដឹកជញ្ជូន បានសហការជាមួយធនាគារ Korea Exim bank រៀបចំសិក្ខាសាលាផ្សព្វផ្សាយតាមប្រព័ន្ធវីដេអូ (Zoom) នៃគម្រោងស្តីពី “ការកសាងទិន្នន័យមូលដ្ឋានស្ថិតិជាតិ ស្តីពីការរាប់ចរាចរណ៍ប្រចាំថ្ងៃជាមធ្យមប្រចាំឆ្នាំ ក្នុងប្រទេសកម្ពុជា (Building National Statistics Database on Annual Average Daily Traffic (AADT) in Cambodia)” ក្រោមអធិបតីភាពឯកឧត្តម វ៉ាស៊ឹម សុរិយា អនុរដ្ឋលេខាធិការ និងមានការចូលរួមពី ឯកឧត្តម សឿន ប៊ុនលី អគ្គនាយកផែន ការ និងគោលនយោបាយ កាលពីថ្ងៃ៤រោច ខែផល្គុន ឆ្នាំឆ្លូវ ត្រីស័ក ព.ស.២៥៦២ ត្រូវនឹងថ្ងៃចន្ទ ទី២១ ខែមីនា ឆ្នាំ២០២២ នៅទីស្តីការក្រសួង។ សិក្ខាសាលានេះ ក៏មានការអញ្ជើញចូលរួមពីថ្នាក់ដឹកនាំ និងមន្រ្តីរាជការនៃអគ្គនាយកដ្ឋានផែនការ និងគោលនយោបាយ និងថ្នាក់ដឹកនាំតំណាងឱ្យអគ្គនាយកដ្ឋានសាធារណការ អគ្គនាយកដ្ឋានបច្ចេកទេស អគ្គនាយកដ្ឋានដឹកជញ្ជូនផ្លូវគោក រួមទាំងថ្នាក់ដឹកនាំនៃធនាគារ Korea Exim bank ទីប្រឹក្សាបច្ចេកទេសគម្រោង (PEC) និងវិទ្យាស្ថានវិស្វកម្មសំណង់ស៊ីវិល និងបច្ចេកវិទ្យាសំណង់កូរ៉េ (KICT)។ សិក្ខាសាលារៀបចំឡើង ក្នុងគោលបំណងធ្វើការផ្សព្វផ្សាយ អំពីការចាប់ផ្តើមដំណើរការអនុវត្តគម្រោង “ ការកសាងទិន្នន័យមូលដ្ឋានស្ថិតិជាតិស្តីពីការរាប់ចរាចរណ៍ប្រចាំថ្ងៃជាមធ្យមប្រចាំឆ្នាំក្នុងប្រទេសកម្ពុជា ” ដែលជាជំនួយរបស់ភាគីកូរ៉េ និងការចែករំលែកបទពិសោធន៍ និងវិធីសាស្រ្តល្អៗ ក្នុងការប្រើប្រាស់បច្ចេកវិទ្យាទំនើប ដើម្បីរាប់ និងព្យាករណ៍កំណើនចរាចរណ៍ប្រចាំថ្ងៃជាមធ្យមប្រចាំឆ្នាំ ក្នុងប្រទេសកម្ពុជា និងប្រទេសកូរ៉េ។ សូមបញ្ជាក់ថា គម្រោងនេះនឹងចូលរួមចំណែកយ៉ាងសំខាន់ ក្នុងការកសាងប្រព័ន្ធទិន្នន័យស្ថិតិជាតិ ដើម្បីអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន និងការកសាងសមត្ថភាពមន្រ្តីរាជការក្នុងវិស័យសាធារណការ និងដឹកជញ្ជូន ឱ្យកាន់តែល្អប្រសើរឡើង ដើម្បីចូលរួមចំណែកអភិវឌ្ឍន៍សេដ្ឋកិច្ចកម្ពុជា។ ជាមួយគ្នានេះដែរ ភាគីកូរ៉េ និងក្រុមការងារទីប្រឹក្សាបច្ចេកទេសមានគម្រោងនឹងចុះមកបំពេញបេសកកម្មការងារ ក្នុងប្រទេសកម្ពុជា ដើម្បីពង្រឹងកិច្ចសហប្រតិបត្តិការ ប្រជុំពិភាក្សា និងចុះពិនិត្យបណ្តាញផ្លូវជាតិសំខាន់ៗដោយផ្ទាល់ ជាមួយអគ្គនាយកដ្ឋានផែនការ និងគោលនយោបាយ និងភាគីពាក់ព័ន្ធ ដើម្បីឱ្យគម្រោងសម្រេចបានជោគជ័យតាមផែនការគ្រោងទុក ៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) សម្រួលផ្សាយដោយ៖ ធូ កុសល