[Rasmei Kampuchea Daily News] - ប្រឡាយ និងផ្លូវភ្លោះ ស្ថាបនាជាប្រភេទបេតុង ជាង ១.០០០ ម៉ែត្រ នឹងរួចរាល់មុនចូលឆ្នាំខ្មែរ
ដោយៈ បូកគោ / កំពតៈ ផ្លូវភ្លោះសងខាងព្រែកជីក ភូមិតាអេង ចំណុចព្រំប្រទល់ រវាងក្រុងកំពត និងស្រុកទឹកឈូ ដែលធ្លាប់ផ្តល់ភាពលំបាក សម្រាប់អ្នកភូមិ ហើយ កំពុងស្ថាបនា ដ៏សស្រោកសស្រាំនោះ នឹងសម្រេចរួចរាល់ នៅមុនឱកាសចូលឆ្នាំថ្មី ប្រពៃណីជាតិ ខាងមុខ។ សមិទ្ធផលជាប្រភេទបេតុងទាំងនេះ ស្ថិតក្រោមគម្រោងកម្ចី ឥណទាន ពីធនាគារអភិវឌ្ឍន៍អាស៊ី ដែលបានអូសបន្លាយ ក្នុងការអនុវត្ត ជាយូរឆ្នាំ មកហើយ។
លោក ជា ចំរើន អ្នកត្រួតពិនិត្យបច្ចេកទេសគម្រោង បានប្រាប់ឱ្យដឹងថាៈ គម្រោងស្តារ និងស្ថាបនាផ្លូវភ្លោះ អមសងខាង និងប្រឡាយ ដែលសាងសង់ ជាប្រភេទបេតុងនេះ បានចាប់ដំណើរការ កាលពីដើមខែធ្នូ ឆ្នាំ២០២១ ដោយឥណទានរបស់ ធនាគារអភិវឌ្ឍន៍អាស៊ី។ មកដល់ពេលនេះ ដំណើរការសម្រេចបានប្រមាណ ៤០ ភាគរយហើយ។ ក្រុមហ៊ុន នឹងខិតខំធ្វើឱ្យរួចរាល់ នាចុងខែមីនា ឆ្នាំ២០២២។
ជាមួយសមិទ្ធផល ដែលនឹងកើតឡើង នាពេលដ៏ខ្លីខាងមុខ ប្រជាពលរដ្ឋ រស់នៅ អមសងខាងផ្លូវភ្លោះ និងប្រឡាយបេតុង បានរៀបរាប់ថាៈ កាលពីមុន នៅទីនេះ មិនមានផ្លូវទេ មានតែស្ពានឈើបាក់ ទ្រុឌទ្រោម សម្រាប់ឆ្លងព្រែកជីកចូលផ្ទះ។ ព្រែកជីកទឹករាក់ សុទ្ធតែសំរាម ហើយធុំក្លិនស្អុយជាប្រចាំ។
អ្នកភូមិ បានបន្តថាៈ រដូវវស្សា ស្ទះទឹកហូរ ទៅព្រែក មិនទាន់ ធ្វើឱ្យជន់លិចផ្ទះ សម្បែង ពិបាកស់នៅ។ លុះពេលឃើញព្រែកជីក ត្រូវបានស្តារ រួចស្ថាបនាជា ប្រឡាយបេតុង និងធ្វើផ្លូវអមសងខាង ជាបេតុងថែមទៀត ពួកគាត់សប្បាយចិត្ត រកអ្វីមកប្រៀបផ្ទឹម ពុំបានឡើយ។
ក្នុងនាមពលរដ្ឋ ដែលធ្លាប់ជួបការលំបាកដ៏យូរឆ្នាំ មកហើយនោះ ពួកគាត់សូមថ្លែង អំណរគុណ ចំពោះថ្នាក់ដឹកនាំខេត្ត ដែលបានពន្លឿង ក្នុងការស្តារព្រែកជីក រួចធ្វើ ប្រឡាយ និងផ្លូវអមសងខាង ប្រវែងជាងមួយគីឡូម៉ែត្រនេះ៕/
