ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញថ្លែងសន្ទរកថាក្នុងកិច្ចប្រជុំACMECS (កិច្ចពិភាក្សា យុទ្ធសាស្ត្រសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ លើកទីបី តាមប្រព័ន្ធវីដេអូពីចម្ងាយ ថ្ងៃពុធ ១៣កើត ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៧ ខែវិច្ឆិកា ឆ្នាំ២០២១ រាជធានី ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញ ថ្លែងសន្ទរកថាក្នុងកិច្ចប្រជុំACMECS (កិច្ចពិភាក្សាយុទ្ធសាស្ត្រសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ លើកទីបី តាមប្រព័ន្ធវីដេអូពីចម្ងាយ ក្រោមកិច្ចសម្របសម្រួលពីឯកឧត្តមPablo Kang ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា។ កិច្ចប្រជុំនេះរៀបចំឡើងក្នុងគោលបំណងស្វែងយល់ពីវិធីផ្តល់គុណតម្លៃជាយុទ្ធសាស្ត្រដល់ក្របខណ្ឌកិច្ចសហប្រតិបត្តិការACMECSក្នុងការបំពេញបន្ថែមដល់យន្តការអនុតំបន់ផ្សេងទៀត ក៏ដូចជាដើម្បីប្រមូល ធាតុចូល និងមតិយបល់ពីភាគីពាក់ព័ន្ធទាំងអស់សម្រាប់ការពិនិត្យពិចារណាមុនកិច្ចប្រជុំឧត្តមមន្ត្រីACMECS។ ថ្លែងសន្ទរកថាទៅកាន់អង្គប្រជុំនាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់ពីតួនាទីយ៉ាង សំខាន់របស់ACMECS ក្នុងការជួយបំពេញបន្ថែមទៅលើការកសាងសហគមន៍សេដ្ឋកិច្ចអាស៊ាន និង បានជម្រាបជូនអង្គប្រជុំអំពីលទ្ធផលនិងបញ្ហាអាទិភាពដែលជាលទ្ធផលនៃកិច្ចប្រជុំរដ្ឋមន្ត្រីដឹកជញ្ជូន អាស៊ាន ដែលឯកឧត្តមទេសរដ្ឋមន្ត្រីបានធ្វើជាប្រធានដឹកនាំកិច្ចប្រជុំកាលពីថ្ងៃទី១១-១២ ខែវិច្ឆិកា ឆ្នាំ ២០២១។ សូមជម្រាបជូនថា៖ ACMECS ត្រូវបានបង្កើតឡើងនៅឆ្នាំ២០០៣ មានប្រទេសជាសមាជិកចំនួន ប្រាំរួមមាន៖ កម្ពុជា វៀតណាម ឡាវ មីយ៉ាន់ម៉ា និងថៃ មានគោលបំណងតភ្ជាប់គម្លាតសេដ្ឋកិច្ចក្នុង ចំណោមប្រទេសទាំងអស់ជាសមាជិក និងលើកកម្ពស់វិបុលភាពនៅក្នុងអនុតំបន់ប្រកបដោយនិរន្តរ ភាព។ ក្របខណ្ឌកិច្ចសហប្រតិបត្តិការថ្មីនេះ ត្រូវបានរំពឹងថា នឹងដើរតួជាប្លុកអភិវឌ្ឍន៍ និងជំរុញអាស៊ានឱ្យឆ្ពោះទៅមុខក្នុងល្បឿនកាន់តែលឿនដោយឈរលើមូលដ្ឋានរឹងមាំនិងពឹងផ្អែកលើខ្លួនឯង និងវិបុលភាព រួមគ្នា៕