ការដ្ឋានសាងសង់ស្ពានបេតុងខ្សែកាប្លឆ្លងកាត់ទន្លេបាសាក់ពីមជ្ឈមណ្ឌលកោះពេជ្រមកកោះនរាសម្រេចបាន ៥០ ភាគរយ។ លោក អ៊ុង រ៉ូន ចៅរងទី១សង្កាត់និរោធ បានឲ្យកម្ពុជាថ្មីនៅថ្ងៃទី ៥ ខែវិច្ឆិកានេះថា ចំពោះលទ្ធផល នៃការសាងសង់ស្ពានបេតុងខ្សែកាប្លឆ្លងកាត់ទន្លេបាសាក់ពីមជ្ឈមណ្ឌលកោះពេជ្រ ស្ថិតក្នុងសង្កាត់ទន្លេបាសាក់ ឆ្ពោះមកភូមិកោះនរាសង្កាត់និរោធ ខណ្ឌច្បារអំពៅ រាជធានីភ្នំពេញ បានសម្រេច ៥០ ភាគរយហើយដែលក្នុងនោះគឺការសាងសង់គ្រឹះសសរស្ពានតែម្តង។ លោក អ៊ុង រ៉ូន បានបញ្ជាក់ថា បើគិតពីថ្ងៃបើកការដ្ឋានសាងសង់ នាថ្ងៃទី ២ ខែវិច្ឆិកា ឆ្នាំ២០២០ មកដល់ថ្ងៃទី ៥ ខែវិច្ឆិកា ឆ្នាំ២០២១នេះគឺមានរយះពេល ១២ ខែមកហើយ។ ស្ពានបេតុងខ្សែកាប្លឆ្លងកាត់ទន្លេបាសាក់ មានប្រវ៉ែង ៤៤៦ម៉ែត្រ និងទទឹង២១.៥០ម៉ែត្រ។ សសរគ្រឹះស្ពានមានចំនួន៤។នៅលើទ្រូងស្ពានមាន៤គន្លង ដែល២គន្លងសម្រាប់រថយន្ត គន្លង១ សម្រាប់ម៉ូតូ និង១គន្លងទៀតសម្រាប់អ្នកថ្មើជើង។ គម្រោងចំណាយនៃការសាងសង់ស្ពាននេះអស់ចំនួន៤៩លានដុល្លារហើយតម្រូវឲ្យសាងសង់រួចរាល់ក្នុងរយះពេល​៣៥ ខែ។ ហើយមកដល់ថ្ងៃនេះគឺការស្ថាបនាបានប្រមាណ៥០ភាគរយដែលក្នុងនោះក្រុមការងារសាងសង់បានខិតខំធ្វើទាំងថ្ងៃទាំងយប់ដោយផ្លាស់វេនគ្នាសម្រាកដើម្បីឲ្យបានសម្រេចមុនគម្រោង៕ អត្ថបទ៖ នរា