ថ្ងៃចន្ទ ១២កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៨ ខែតុលា ឆ្នាំ២០២១ នៅទីស្តីការក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំវាយតម្លៃពីវឌ្ឍភាពការងារគ្រប់គ្រងគម្រោងកែលម្អការផ្គត់ផ្គង់ទឹកស្អាត និងអនាម័យនៅកម្ពុជា ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីក្រុមការងារជំនាញរបស់អគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និងដឹកជញ្ជូន តំណាងក្រសួង-ស្ថាប័ន តំណាង ធនាគារពិភពលោក និងភាគីពាក់ព័ន្ធផងដែរ។ អង្គប្រជុំបានជជែកពិភាក្សាអំពីបញ្ហាបច្ចេកទេសជាមួយអ្នកអនុវត្តគម្រោង ស្ថានភាពនៃការគ្រប់គ្រង ហិរញ្ញវត្ថុ ការងារលទ្ធកម្ម និងការវាយតម្លៃវឌ្ឍនភាពការងារ បេសកកម្មក្រុមការងារពាក់ព័ន្ធ និងផែនការ សកម្មភាពសម្រាប់ការពន្លឿនការអនុវត្តគម្រោងផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមអនុរដ្ឋលេខធិការ បានថ្លែងអំណរគុណយ៉ាងជ្រាលជ្រៅដល់ ក្រសួង-ស្ថាប័ន ដែលបានចូលរួមវាយតម្លៃការអនុវត្តគម្រោងប្រកបដោយស្មារតីទទួលខុសត្រូវ ជាពិសេស និងទីប្រឹក្សាគម្រោងនៃអង្គភាពគ្រប់គ្រងគម្រោងសមាសភាគ២(CMU-2) ទាំងពីរដែលបានខិតខំប្រឹង ប្រែងបំពេញការងាររបស់ខ្លួនយ៉ាងសកម្ម និងសង្ឃឹមជឿជាក់ថា៖ គ្រប់ភាគីពាក់ព័ន្ធទាំងអស់ នឹងបន្តកិច្ចសហការល្អ ដើម្បីសម្រេចលទ្ធផលតាមផែនការដែលបានគ្រោងទុក។ ទន្ទឹមគ្នានោះដែរ ឯកឧត្តមអនុរដ្ឋលេខធិការ បានជំរុញលើកទឹកចិត្តឱ្យក្រុមការងារពាក់ព័ន្ធយកចិត្តទុកដាក់រៀបចំផែនការសកម្មភាពឱ្យបានច្បាស់លាស់ ដើម្បីធានាឱ្យដំណើរការគម្រោងបញ្ចប់ការតាម គ្រោងទុក និងបន្តទៅអនុវត្តកញ្ចប់ការងារប្រឹក្សាគម្រោងលើការងាររៀបចំគោលនយោបាយ និងការ កំណត់សេវាកម្មកម្រៃទឹកកខ្វក់(MPWT-CW-3) រហូតដល់MPWT-CS-5 ដែលបានកំណត់ក្នុងឆ្នាំ ២០២២ និងឈានទៅសម្រេចបាននូវគោលដៅអភិវឌ្ឍន៍គម្រោងនៅឆ្នាំ២០២៤ ជាពិសេសធានាសម្រេចបាននូវសមិទ្ធផលទឹកស្អាត អនាម័យជូនបងប្អូនប្រជាពលរដ្ឋ ស្របតាមចក្ខុវិស័យ និងផែនការព្រមព្រៀង នៃគោលដៅអភិវឌ្ឍន៍ប្រកបដោយចីរភាពរបស់សហប្រជាជាតិ ឆ្នាំ២០៣០៕